A Kong Hngalh Hnak In Amah Hngalh A Tha Deuh. Dan 11:32…sihmanhsehlaw an Pathian a hngaltu hna cu an thawng lai i thil lianngan kha ah tuah lai (…but the people who know their God will be strong and take action).2Tim 1:12 …zeicahtiah ka zumhmi pa cu ka hngalh…( …for I know whom I have believed).Nihin cu zahan zaan kan sang (Taungthukung) pumhnak i ka chimmi ka van in hrawmh hna.
Ka lung a um tukmi te asi.Nihin caah Pathian Bia” ti ka rak tialmi ah Hngalhfian Thawnnak” timi kong ka tial. Pu Hrang Nawl kong ka rak hngalh ngai nain amah he kan i ton le kan i kawmh hnu cun aka hngalh ve ka hngalh ve tikah ka rak theihmi a hman tuk zia kai fiang ti le kong hngalh le amah hngalh timi cu ai dang tuk ti ka langhter. Pu Hrang he kan i hngalh hnu cun a zeimaw caanah ka ngai tuk tawn.
Ramdang i sianginn ka kai lio zongah ka chung le tluk in ka ngai tawn. Atu zongah ka ngai tuk i ka hlam tawn rih. Kan Pathian zong Amah he i hngalh hleng lo in a kong hi hngalh tengtung khawh asi. Asinain Amah bak van hngalhnak tu nih cun kan nun a thlen pinah a thawnter. Baibal chung i zumhnak ah mi minthang hna paohpaoh cu Pathian a kong men si lo in Amah he an i hngal.
Cucu an nunnak hrimhrim ah hmuh khawh in a lang. Mah kong hi Daniel chung in tawiten zoh hmanh usih.1. An Pathian a hngalmi cu an thawng bak ko, Dan 11:32. Kan Lai Baibal Thiang nih mah ka zawn a lehmi cu duh thu a sam deuh lo. Cucaah Kawl le Mirang Baibal zong rel chih. Acung i ka lehning hi a dik deuh. Daniel le a hawile nih siangpahrang rawl le misurhang an din duh lo kha an zumhnak a thawn caah asi, Dan 1:8-16.
An biakmi Pathian kha an rak hngalhnak nih a thawnter hna. 2. An Pathian a hngalmi hna cu an thawn pinah cu Pathian kong cu an tuaktan i an ruat lengmang. Daniel nih a voi hnihnak siangpahrang mang a leh tikah Cung Nung Bik Pathian kong a chim chih peng,Daniel.4:25.Kannih zong Jesuh Khrih hi kan hngal tak ahcun a kong hi kan ruat deuh lai,cun a kong ceih zong kan hlawp a tlo deuh ko lai.Amah kong hlasak zong kan cim tawn lai lo.
Pathumnak. An Pathian a hngalmi cu an ral zong a tha. Nebukhadnezar nih sui milem a sermi biak kha a fial hna tikah Daniel a hawile pathum nih an duh nai sai lo. Meiphu paih ding asi ti an hngalh buu zongah cu milem hmaiah an kun naisai lo,Dan 3:13-25. 4. An Pathian a hngalmi cu harnak fakpi an cung a tlun zongah Pathian cungah an lung a tling ko.
Daniel hawile pathum kha Nebuchadnezar nih a sui milem hmai kun ding in a hnek hna tikah an lehning kha uar a um tuk. Kan Pathian nih meiphu chung in a kan khamh khawh ko, cun a hei kan khamh lo zong ah na sui milem cu kan bia lai lo tiah an ti kha mu,Dan 3:16-18. Paul le Sailas zong kha thong chung i an thlak tik hnaah Pathian cungah an vuivai lo. Thlatu an cam i hla kha an sa i thongtla dang nih an ngaih hna,Lam 16:16-25.
Atulio i kan ram buainak ruangah harsatnak a tongmi zong kan Pathian cungah nan vuivainak kan theih lo tikah kan tha a nuam. Bawipa nih Daniel siseh, a hawile si hna seh, Paul le Sailas zong si hna seh,a chanh hna i a luatter hna bang an chanh ve te ko hna lai. Paul kha ti taitai i a zumhnak a thawn kha Jesuh Khrih kong tampi a theih caah asi lo.
Amah Khrih hrimhrim kha a hngalh ( 2Tim 1:12) caah asi. Thong chung a um lio zong ah vuivainak ngei lo in midang kha a fawrh hna. Khan a duhmi kha hitin a langhter. Ka duhmi cu amah Khrih HNGALH le a thawhthan thawnnak hmuh ve le temhninnak a inmi in ve le amah thih bantuk in thih ve lawng hi asi cang,” Filipi 3:10.Jesuh Khrih kan hngalh i amah he rawl kan dum tinak lai ( Bia 3:20)Bawipa nih mah caparte in lam kan hruai ko seh. Amen!! Credit: Thio Za
Leave a Reply