Pu Van Hulh Kum 58 A Tlau. Pu Van Hulh ( kum 58) cu nithum ni 06/15/2022 in tutiang inn a hlam lo caah a innchungkhar caah khuaruah har vansang in an um lio asi tiah thawng theih a si. Pehzulh tein thlacamnak in bawmh an herh caah kiangkam nan kalumnak ah khua zoh deuh in a mah hawlnak in bawm cio hram rih ko hna usih.
Pu Van Hulh caah thaizing 11am ah a tlau i bawmh kan herh ko timi catlap pawl cu a tlau thawknak hrawng sang ah phawtzam ding timtuahnak ngeih a si. Cucaah Chin community chungin a chuah kho mi paoh nih a mah hawlnak caah i thawh cio dingin nawlnak zong an tuah. Atanglei address ahhin thaizing 11am (06/18/2022) ah iton dingin thawngthanh chih a si. Cherry Grocery 3765 W Walnut St, Garland, TX 75042. Credit:Salai Lian
Dr. Rual Uk Nih Fianternak Atuah. Jesuh Min Tipil Pek Timi A Umnak Baibal Kong Fianternak. Mizo nih an lehmi Revised Standard Version (RSV) timi hi mithi kan pa pakhat Rev. James Sang Awi nih Biakam Thar lawng a rak leh i Lamkaltu dal 8 câng 16 a donghnâk ah zeitintiah Bawipa Jesuh min lawngin Baptisma pek an rak si rih” tiah a rak ti.
Hika zawn Baibal hi RSV ah but they had only been baptized in the name of the Lord Jesus tiah ti a si i Lai holh or Lai ca ah cun, Bawipa Jesuh min in tipil a ing mi lawng an rak si tiah ti ding a si. Zeicatiah RSV hi Mizo zong nih an leh mi a si i Lalpa Isua hmingin baptisma an chang chauh a la ni tiah a ti. Cun Dr. PC Biaksiama zong nih, Lalpa Isua hmingin baptisma an chang chauh a la ni a”
tiah a ti ve.
Cun Dr. Sui Lian Mang zong nih, Bawipa Jesuh min in baptisma an co lawng hi a rak si tiah a ti. Cun Saya Hoi Cung Tum zong nih, Bawipa Jesuh min lawngin baptisma a comi an rak si tiah a ti ve. Rualuk Study Baibal zongah, Bawipa Jesuh min in baptisma a ingmi lawng an si. tiah a ti. Cun Laimi tam bik nih kut tlaih ah kan hmanmi Lai Baibal Thiang timi zong ah, Bawipa Jesuh min in tipil lawng an rak ing rih tiah a ti ve.
Cucaah Rev.James Sang Awi nih ‘pek’ timi biafang a hman mi hi a rak palh mi a si. Zeicatiah Baibal lettu mizei hmanh nih ‘pek’ timi bia an hmang lo. Cun Rev. James Sang Awi nih hin Lam kaltu. 2:38. le 10:48 le 19:5 zong ah “pek” timi bia a hmang fawn lo. Cucaah kha ka zawn kha a rak palh mi a si. Cun hi Baibal hi a lettu Rev. Sang Awi a nun lio ah an inn pawng ah Bethel Baptist Churh a rak um lio ah crusade kan rak ngei i hi Baibal hi mi pa khat nih ai rak put.
Matthai 1:20 a donghnâk ah Zeitintiah nau a pawimi cu Thiang Thlarau thawngin a si timi kha a rak hrelh dih. Amah kha an va zohter i ka palh mi a si kan remh zau lai tiah a rak ti. A thih hnu ah CACC nih a chung le sinah an hal i an pek hna. Asinain CACC zong nih țha te check ta loin reprint an tuah cawlh i a tu tiang zongah Mathai 1:20 a dongnâk, Zeitintiah nau a pawimi hi Thiang Thlarau thawngin a si timi kha remh a si hlei lo.
Cucaah Rev. James Sang Awi nih a palh mi kha i lak zau in ‘Baibal ah Jesuh min tipil pek a um’ tiah hrambunhnâk ah hman i dirpi hi a himmi hrambunhnâk a si lo. Zeicatiah palhmi a si. ‘Pek’ timi lawng si loin “Bawipa Jesuh min lawngin” timi ah ‘lawng’ timi bia zong a um lonak dingah umter mi a si. Zeicatiah mirâng ah “they had only been baptized in the name of the Lord Jesus” ti a si caah Lai holh asiloah Lai ca ah cun”Bawipa Jesuh min in tipil a ing mi LAWNG an rak si” tiah ‘Lawng’ timi hi a dongh lei ah chiah hrim hrim ding a si.
Hika zawn ‘LAWNG’ timi bia chiahnâk ah hin Saya Hoi Cung Tum zong nih a rak palh ve. Pathian dah ti lo minung cu a palh kho mi kan si bangin Rev. James Sang Awi zong minung a si ve caah a rak palh ve. Kei zong ka palh kho i nang zong na palh kho. Asinain Pathian nih Cathiang thaw a chuah hnawhmi țhathnemnâk pali lak ah pathum nâk cu Palh mi remhnâk caah” tiah a rak ti bangin kan palhmi kan i hngalh tikah Pathian biatak hmangin kan i remh hi Cathiang cawnpiak ning a si. 2Tim. 3:16. Credit: Dr Rual Uk.
Leave a Reply