SAC nih uknak an lak hnu kumkhat reng lo chung ah SAC Ralkap kut in minung 1,673 an nunnak a liam cang i, cu chung ah nu le ngakchia 290 an i tel, tiah NUG Ministry of Women, Youths and Children Affairs nih a thanh. Uknak lak hnu in April 11 tiang ah nu 156 le ngakchia 133 an nunnak a liam cang i, SAC ralkap kut in a nunnak a liam mi dihlak chung ah zatuak in 17 (17%) a si.
SAC ralkap kut in a nunnak a liam mi chung ah hin mino a tam cem an si.A nunnak a liam mi an tam cemnak hmun hi Sagain ramṭhen ah a si i, Chin ramkulh le Kaya ramkulh chung zong ah a nunnak a liam mi an tam ngai, tiah nuhrin covo lei a cawlcangtu phu hna nih an chim. SAC in chimphuannak nawlngei Zaw Min Thun nih cun NUG nih a thanh mi cazin hi a dik mi a si lo, anmah duh poh in an thanh mi a si, tiah a chim ve. Credit: The Chin Post
Cabia dang. Dr. Sasa nih a ttuanmi rian pawl fiangtein a chim. Dr Sasa chimmi chungin a tawinak in, Kannih NUG cozah cu mipi caah a tuan ding kan si bangin kan tuanmi vialte mipi sin ah chim kan duh. A chimmi chungin a tawinak in atanglei bantuk in a si.Tutan kan tuah cuahmah mi dothlennak hi Pathian nih pekmi tuanvo asi tiah ka ruah. Cucaah kei zong nunnak thaap in ka tuan hi a si. Dothlennak timi cu fiangtein kan chim asi ahcun thatlonak kha a thatnak lei doh tinak a si.
Phundang in kan chim ahcun thihnak kha nunnak in kan doh tinak zong a si.Ralhrang uknak cu Federal Democracy uknak caah kan doh. Ralhrang uknak kan doh timi cu phungkalh in cawlcangh kha dihter asi. Kei zong NUG cozah dirhmun in ramdang palai le biachimtu dirhmun in tuanvo pek ka si in a si khawh chungin UN Palai, UN i tuanvo ngeitu ka chawnh hna i bia ka ruah hna.Hmaitonh in bia ka chimh hna caan zong a um i tuni tiang asi khawh chungin ka tuan cuahmah ko.
UN nih kawlram palai an thimmi zong ka chawnh. ASIA Myanmar palai zong ka chawnh. Cun vawleicung buu dangdang siseh hruaitu hna zong kawlram kongah voitampi bia ka ruah hna. UN nih kawlram dan an tat khawhnak dingah R2P dirhmun zongin bia tampi ka chimh hna.Cun ramdang hluttaw hna zong a si khawh chungin bia ka ruah hna i a bik in UK hluttaw zong ralhrang cohlan lo dingin bia ka ruah hna i, a tak in a tlamtling cuahmah.
France hluttaw zong ralhrang cohlan lo dingin bia ka ruah hna i, NUG cohlan dingin ka sawm hna, EU Hluttaw zongah bia ka chim i, ralhrang an dan an tat cuahmah hna. American hluttaw, Norway le Germany, Italy, Denmark, New Zealand, Japan, Australia hluttaw tibantuk zong bia ka ruahpi hna. Ka timi hna cu ralhrang cohlan lo ding le ralhrang dantat ding tibantuk a si. Kan chimmi tthenkhat cu chim awk a ttha rih lomi zong a um.
Bia kan chim tikah ralhrang bawi le ralhrang tuanpi hawi company tthenkhat zong dan an tat cuahmah hna.Abiapi mi pakhat cu ralhrang sin ah hriamnam zuar lo dingin kan ruah hna i datsi zong zuarh lo dingin kan i ruah. Ramleng in ralhrang an cohlan tikah kan dothlennak a dih kho i, cubantuk thil a can lonak dingin a si khawh chungin kan ruah hna. Ralhrang bawmhnak kongkausiseh covid zawtnak caah a harhmi bawmhnak tibantuk zong tampi kan hmuh.
Cun kawlram buainak he pehtlaiin ICJ le ICC zongah ralhrang nih ningcang loin phung an buarmi phunphun thong 50 renglo kan chiah cang. Hibantuk pawl hi NUG dirhmun in tuanvo ka lak hnu ah a si khawh chungin ka tuahmi pawl an si. Kawlram kong zong ramdang thawngzamhnak ah tampi aupi i, ramdang sin ah bawmhnak zong ka hal. Hihi dotthlennak ah abiapi ngaimi pakhat asi ve. Teinak lam a nai cang hnu kan kir lai lo, Adih hlan lo zakhat ah zakhat kan kal lai.
Leave a Reply