APOI TUK E RALHRANG NIH ZA HUM MANG ANTHAH DAN CU LUNG FAK TUK E

Falam peng ah civil mi Za Hum Mang cu SAC ralkap nih an tlaih i an thah hnu ah uniform hrukter in, CNDF ralkap bantuk in an langhter, tiah tantak mi a chungkhar hna nih Khit Thit Media ah an chim. May 29 ahkhan an khua ah SAC ralkap cu an rak lut i, Za Hum Mang nih a hmuh hna tikah lau tuk in a zaam caah SAC ralkap nih cun an tlaih i an thah tiah theih a si.

Za Hum Mang a upa nih cun, “Ka upa Za Hum Mang cu CNDF, PDF na si ti in an kah colh. CNDF uniform an hrukter hnu ah CNDF kan tlaih tiin an langhter rih i, a ruak cu mei in an khangh. Ka upa hi mi sawhsawh a si. Khuachung a um lio ah SAC ralkap cu an rak lut i, lau tuk in tlik a timh caah an tlaih i an thah.

Cun, a ruak zong mei in an khangh. Kan lung a fak tuk hringhran, a nupi le a fale a kaltak hna i, amah hi kum 37 mi a si,” tiah a chim. CNO nih, May 29 ah Zawlpi khua ah SAC ralkap nih CNDF ralkap pakhat le khuami 1 an tlaih hna i an thah hna hnu ah mei in an khangh hna, tiah an langhter..Crd; The chin post