Nigeria Biakinn pakhat cu meithal aa tlaihmi misual hna nih an kah i, minung 50 renglo an nunnak a liam. Nizan June 5 Sunday ah Nigeria ram i, Ondo State, RC Biakinn pakhat cu misual hna nih an kah i minung tampi an nunnak a liam tiah thanhnak an tuah. Hi konghe pehtlaiin Owo i sizung pakhat ah Sibawi pakhat nih a chimmi cu aa pummi zeimaw zat cu a thi cia in an rat pi hna tiah a chim.
Ondo State i police thanhnak nawlngeitu Funmilayo Ibukun Odunlami nih a chimmi cu tuni ah Owo i Saint Francis Catholic biakinn thil a cang a ummi hi thanhnak an tuah colh lai tiah a chim ve. Meithal aa put mi hna hi aa pummi hna cu an kah hna i, Biakinn chungah thil an puah rih tiah khuachung thawngzamhnak nih an langhter.
A nunnak a liammi chungah hin hngakchia tampi an i tel tiah a chim chih. A nunnak a liammi hi fiangtein theih an si rih lo. Asinain minung 50 nak tlawmlo cu an si lai tiah Nigeria Lower House i Owa area aiawhtu Adelegbe Timileyin nih a chim.
Thawngpang dang. Uico ralhrang nih ningcang loin nawlngaihnak an lak hnu ah mipi 3165 an thah cang hna. Cun mipi tinghra leng an zaam. Mipi umnak inn ralhrang nih an khanghmi hi Inn 19635 asi tiah an langhter. Min Aung Hlaing hruainak in ralhrang nih nawlngaihnak an lak hnu kum 2021 February thla in 2022 May thla tiang ah mipi 3165 ralhrang nih an thah cang hna. Myone 86 ah mipi umnak inn an khanghmi hi 19635 asi cang tiah Media Monitor Colletive phu nih thanhnak an tuah.
Ramkulh le Ramthen in myone 86 chungin khua 400 renglo mipi inn an khangh cang. Sagaing ramthen lawngah inn 12687 an khangh i Magway ramthen ah inn 4304 an khangh. Cun Chin ramkulh ah inn 1376 an khangh i Kaya ramkulh ah Inn 360 an khangh. Cun Shan ramkulh ah inn 329 an khangh i Kayin ramkulh ah inn 166 an khangh. Shan ramkulh ah inn 137 an khangh i Mandalay ramthen ah inn 118 an khangh.
Kachin ramkulh ah inn 58 a si i, Tanintary ramthen ah inn 37. Mon ramkulh ah inn 30, Pekhu ah 26 an khangh.Yangon ramthen ah inn 4 a si i, Pekhu nichuahlei ah inn thum an khangh.Ralhrang kawlralkap hriamnam in hliammi khuami hna hi minung 1112 an si cang. A ruang um loin ralhrang uico hna nih mipi an tlaih mi hna hi minung 16251 an si cang. Cun ralhrang kawlralkap hna khuami mipi phaw ah an hmanmi hna hi minung 1353 an si cang tiah MMC nih thanhnak a tuah.
Leave a Reply