Magwe ramthen, Pwintphyu peng, Pathein-Monywa lam Mayzaly hlei ah PDF pawl cit mi SKAT motor cu council ralhraang nih an kah i 12 an thi, 3 an tlaih hna tiah palek thawnghram in theih a si. Nihin zing ah PDF pawl cit mi motor cu ralhraang Captian Min Paing Soe hruaimi nih an check hna lio ah kap hnih kar kahdohnak a chuak, motor zong a puak i motor cung cuang PDF 12 an thi, 3 an tlaih hna nain 2 cu an nunnak tiang tihning in hliamhma an tuar.
Pwintphyu peng palek bawi Win Oo hruai mi nih checkhlatnak an rak tuah tiah kan theih. Motor cungah hriamnam zun 25 a um i 19 cu an rawk dih, 6 lawng a tha mi um. 40 MM hriam ngan zong a rawk dih. PDF pawl ruak le hriamnam hna cu ralhraang nih an lak. Cu Mayzaly hlei ah cun a hngaktu ralhraang tampi an chiah hna tiah kan theih.
Relchih; Magway ramṭhen, Gangaw peng khuate pathum phungki sianginn ah mizapi nih pek(hlutmi) mi sui, thil mansung le ralzam mi hna an sui, ngun, phone le cycle hna cu SAC ralkap nih an firpiak hna, tiah tualchung phungki pakhat nih a chim. June 19 zing sml 8:00 hrawng ah Gangaw peng Myintthar Se (မြစ်သာဆည်) in SAC ralkap 70 cu ralkam an sial i, Panan le Sape (ပနန်းရွာ၊ စပယ်ရွာ) khua ah an lut.
Inn khat hnu inn khat in an lut i sui ṭhi le tangka tam tuk an fir. Sinpung (စင်ပုံ) khua phungki singinn tangka le mizapi nih an pekmi thilri hna zong an fir i, umhmun an khuar beh, tiah theih a si. June 20 zinglei ah motor lam khattelei ah ummi, Sape khua ah an lut ṭhan i, phungki sianginn ah aa dormi ralzam hna an sui, ngun le an phungki sianginn ah pek ding in an i chiahmi thilri hna cu SAC ralkap nih an firpiak hna.
Sape khuami an thilri mansung hna cu SAC ralkap nih an firpiak hna hnu in Panan khua lei ah an kal i, Panan khua phungki sianginn chung ummi tualchung mi an sui, tangka le cycle 20 leng cu mei in an khangh piak hna, tiah theih a si. SAC ralkap pawl nih tualchung mi hna cu nan thilri nan kan pek lo ahcun nan inn kan khangh dih lai, tiah an tlerh hna.
Panna, SinPung, Sape, Yinmar khuami hna cu April thla ah voikhat le May thla dih lai ah voikhat vanlawng in an kah. June thla chung zongah an zam dih i, khua chung ah a hohmanh an um ngam lo, tiah theih a si. Crd. The Chin Post.
Leave a Reply