Ralhrang nih an khangh tthan hoi e, Kahdohnak zong a um lo nain ralhrang nih khua an khangh. Sagaing ramthen Salyinkyi peng le Magway ramthen Poh peng le Myang peng chungah a ummi khua hna cu ralhrang kawlralkap hna nih nizan July ni 28 ah an khangh. Kahdohnak zong um lo in an khangh tiah khuami nih an chim.
July ni 28 suimilam pariat ah Paoh peng Kyapitkan khua ah ralhrang kawlralkap le palik le Pyu Saw Htee hna nih mei an khangh. Cun Myang peng Kauhsauh khua zongah an khangh tiah theih a si. Kyapitkan khua cu nizan suimilam pariat ah uico ralkap le uico palik le pyu saw Htee hna nih an khangh i khuami hna cu an zaam dih.
Cun Sagaing ramthen Salinkyi peng Yekha khua zongah ralhrang kawlralkap minung 20 renglo nih inn an khangh rih tiah theih a si. Hi khua hi inn 200 renglo an umnak khua a si. Kahdohnak zong a um lo i, khuachung ah ralhrang an lut i, an khangh tiah an langhter. Nizan zanlei zongah Magway ramthen Myang peng, Ngiangpintha khua zong an khangh rih tiah theih asi.
Ralhrang kawlralkap le mipi ralkap hna cu Ngaingpintha thlanglei ah zanlei sang ah i kahdohnak a chuak, Kahdohnak a dih hnu PDF pawl hnu an kir hnu ah ralhrang kawlralkap hna cu khuachung ah an lut hna i, inn an khangh tiah an langhter. Inn zeizat dah an khangh mi a si timi cu theih asi rih lo tiah an chim.
Thawngpang dang. Mipi ralkap drone nih ralhrang kawlralkap minung pasarih a thah hna pin ah minung 18 hliam an tuar rih. Sagaing ramthen Minbu peng ah ralhrang kawlralkap hna cu mipi ralkap hna nih July ni 27 ah drone in bomb an thlak hnawh hna i, ralhrang kawlralkap minung pasarih an thih pin ah minung 18 hliam an tuar tiah Zero Guerrilla Force nih an thanh.
Nizan ah Minmu peng, Moe Mandalay khua ah ralhrang kawlralkap hna nih Helicopter in an kah hna i, tanglei in an kah rih hna. Ralhrang kawlralkap hna cu Kanpha khua lei an tolh lio ah mipi ralkap hna nih an rak kah hna tiah theih a si.Ralhrang kawlralkap tutan a phomhtu hna hi Zero Guerrilla Force le ZERO POWER Revolutionary Force hna an si.
Leave a Reply