Thawngpang ttha taktak ralhrang tangah rian a ttuahmi lutlai pahnih an kahthah hna. Mandalay, Putingkyi peng ah ralhrang kawlralkap hna nih Kantha khua bawi ah an thimmi le USDP tawlreltu Than Shwe cu meithal in kahthah an si tiah thawng thanhnak an tuah cang.
Tuni June ni 19 sunday suimilam pakhat le minute 30 ah Kantha khuabawi le USDP tawlreltu Than Shwe cu an inn ah kahthah an si tiah theih a si, Hi konghe pehtlaiin mipi ralkap lei in nawlngeitu pakhat nih thanhnak an tuahmi cu an inn cia ah thah ans i tiah an langhter.
Hi konghe pehtlaiin Kachin ramkulh Phakanh ah Suhpawng zung ah bomb pakhat zong a puak. Suimilam hleikhat hrawngah bomb a puah hi a si. Hi bomb puahnak ah a thimi siseh hliam atuar mi an um le um lo theih a si lo tiah an langhter chih.
Thawngpang dang. Rampi ruahnak petu Daw Aung San Suu Kyi cu tuni June ni 19 ah kum 77 a tling cang. Aung San Suu Kyi cu a nunnak lamthluan ah kum 35 chung rampi caah rianttuan in caan a hmangmi a si. Ralhrang kawlralkap hna nih atu le tu ti awk in an tlaih ruangah voi 16 bak a chuah Ni hi erhkhumh in a hmang cang.
Ralhrang lutlai Min Aung Hlaing nih nawlngaihnak a lak ah rampi ruahnak petu Aung San Suu Kyi cu case 19 in taza cuai a si. Tu bantuk ralhrang nih sualpuh tazai cuai in kharkhumh in an hren ruangah a tutan a chuahni sunglawi zong erhkhumh in a hmang tthan.
Aung San Suu Kyi cu kawlram mipi nih an duh bik mi le an uar bik mi politician pakhat a si. Tuni June ni 19 ah Aung San Suu Kyi chuah Ni a sibantuk in a biachim mi chungin a laar taktak pakhat Freedom From Fear timi ca keng in kut khat lei in 77 timi cafang ngan mi zong social media ah ralhrang dohkalhnak tuah dingin duhnak langhtertu hna zong an forhfial.
Leave a Reply