Magway ramthen Pauk peng, Kaanle khua ralhrang palik sakhan cu PDF nih an luh hnawh. Uico ralhrang palik pakhat zong an tlaih chih. Ralhrang hna nih cunglei helicopter in an kah hna tiah khuami pakhat nih a chim. Tuzing suimilam paruk hrawngah PDF hna nih palik sakhan hi an kah mi a si.
Kahdohnak a chuah lio ah ralhrang hna nih cunglei in an bawmh hna. Mah palik sakhan hi Razu Maung nih a hruaimi hna a si. Atu hi ralhrang hna cu an hawi le bawmh dingin an ra cuahmah tiah theih a si. Kahdohnak a chuah ruangah khuami hna cu a himnak hmun ah an zaam dih tiah theih a si.
Hi konghe pehtlaiin khuami pakhat nih a chimmi cu i kahdohnak ah palik pawl hna cu an zaam hna i, inn tthenkhat ah an i thup hna. An hawi bawmh dingin ralhrnag dang hna cu motor in an ra i Taraphi khua pawng an phan cang tiah a chim. Kahdohnak ah hin cunglei in ralhrang hna nih helicopter in an kah hna tiah a chim chih.
Thawngpang dang. Ralhrang bawi Than Hlaing a rian in an dinhter. Ralhrang nih nawlngaihnak an lak hnu ah rianpi taktak pathum tuanvo latu dingah Lietenant General Than Hlaing cu an rak thim. Asinain a rian in an dinhter cang. Amah hi Min Aung Hlaing nih aa bochan taktak mi zong a si. Arian a tlaihmi hna cu a tanglei bantuk in a si.Ramchung vuanci, Kawlram palik lutlai bik le ralhrang ah sinak sang angeimi Kahsahthah 6 lutlai bik sinak hna hi tuanvo an pek mi a si.
May ni 2 ah khan Than Hlaing cu palik bawi sinak le ramchung vuanci lutlai sinak in a rian an dinhter. Thlakhat chung a ttuan hnu ah a tubantuk in an dinhter hi a si.Nawlngaihnak an lak hlan ah amah hi ralhrang zung chungah rian a ttuanmi a si i, nawlngaihnak an lak hnu ah a cunglei langhter rian pawl hna hi tuanvo an pek mi a si. Palik bawibik a si hnu ah ramchung vuanci zung ah hin zung lawng a kai. Ralhrang zung ah kan hmu ti lo.
Kan hnu thla ah khan ralhrang zung ah an thial nak in a min lawng a phan, amah kan hmu lo. Tuthla hramthok ah a rian an dinhternak ca an chuah. Ralhrang lutlai Min Aung Hlaing nih zeiruang ah dah rian a dinhter timi hi fiangtein theih a si lo tiah ralhrang he aa pehtlaimi nih thawngzamhnak ah a chim.Lieutenant General Than Hlaing hi Min Aung Hlaing nih a zumh ti lo caah a rian in a chuah hi a si ko tiah ralhrang lei hlathlaitu hna nih an chim. Sagaing ramtthen ah PDF pawl thah dih dingin special operation an tuahmi a tlamtlin lo caah kahsahthah lutlai in an dinhter. Palik lei ah a rian dinhter asi nain a leng ah kan hmu ti lo tiah an langhter chih.
Leave a Reply