Poituk e, Laimi kan caah thawngpang chia taktak theih asi tthan cang. Kalaymyo in Hakha lei ah a rak kaimi ralhrang kawlralkap hna nih atu hi Hakha peng Chuncung khua cu an khangh cuahmah tiah theih a si. Tuzing tiangah ralhrang kawlralkap nih an khangh mi hi inn 9 a si cang i, adang zong an khangh cuahmah lio a si tiah theih a si.
Relchap. CDF/CNA nih Hakha District Palik Zung le Thantlang Gate an Kah. Nizaan July 13, zaan ah CDF/CNA nih Hakha in Thantlang lei kalnak lam ah a ummi Hakha District palik zung le Thantlang Gate ah a ummi SAC ralhrang pawl an kah hna, tiah thawng kan theih.
Nizaan zaan sml. 10:00 hrawng ah kahdohnak a chuah hi a si i, minute 20 chung hrawng an i kap.Kan miphun ralkap lei nih bomb in an kan hmansa hna i, cu dih cun meithal in pehzul in an kah hna. SAC ralhrang lei in a thimi le hliam a pumi an tam kho tiah an ruahdamh nain zaan a si caah fiang in theih a si lo.
Falam lei in Hakha ah a rak rami SAC ralhrang le Chinland Joint Defense Committee (CJDC) chungtel kan miphun ralkap pawl zong Chuncung khualuhnak ah atu an i kap cuahmah.Hakha le Falam ah a ummi SAC ralhrang nih miakpi in kah an bawmh hna i Chuncung khuachung ah bomb voi 2 a tla cang, tiah thawng kan theih.
Leave a Reply