Breaking News. Kan ralkap hna caah thlacamnak in bawmcio hna usih. Hmunhnih ah an i kah cuahmah lio a si. Tuzing August ni 10 ah Chinram khualipi Hakha khua ah kan ralkap hna le ralhrang kawlralkap pawl hmun hnih ah an i kah cuahmah lio a si. An i kahnak hmun hi Thlacamnak tlang pawng le Vuanci pawl an umnak gate hmun hnih ah an i kap tiah theih a si. Credit: Salai William Hlawnceu
Thawngpang dang. Pakokku thong ah Mindat in tlaihmi minung 70 leng an um. Magway ramṭhen, Pakokku thong ah Mindat peng in khuami 70 leng hren an si i cu chungah nun chung thongthlak dingin biakhiah a simi zong an um tiah theih a si.Mindat peng cu Martial Law chuahnak peng a si i Pakokku thong ah hren a simi hna cu Mindat peng biaceih zung in biakhiahnak tuah hnuah a rak phanmi an si tiah theih a si.
“Atulio ah Mindat khuami 70 leng Pakokku thong ah an phan. A luancia zarh chungah minung 10 an rak phan. A tam deuh cu Mindat biaceih zung in biakhiahnak tuah hnuin a rak phanmi an si. Cu chungah kum saupi tla ding zong an i tel. Nun chung tla ding in biakhiahmi zong an i tel. A tlawmbik sual internak hi rianhrang le thong kum 3 a si” tiah thonginn he aa naihniammi nih Mizzima ah a chim.
Ralkap uknak in biaceihmi sualphawtnak pawl cu State Administration Council cathanh 3/2021 in 2021 March 15 ah a rak thanh i rampi dohtu, cozah a mui chiattertu, ralkap asilole zauk phung a lennak a nuarhtertu, ralkap asilole cozah rianṭuantu pawl hnahnawh peknak, Article 505, cozah rianṭuantu pakhat khat kha sualnak tuah dingin tlerhnak, mi forhfialnak, a dik lomi thawngpang thanhnak Article 505 (A) le tlukruannak a um lomi thiltuahnak timi sualphawtnak pawl an i tel tiah theih a si.
Leave a Reply