Ralhrang kawlralkap pawl Laitlang panh in an i thawh tthan cang. Tuni June ni 27 zingka suimilam pasarih ralhrang kawlralkap hna cu Kalaymyo in Laitlang lei panh in an thawh cang tiah theih a si. Ralhrang kawlralkap hna hi Motor panga khat bak in an si i zingka suimilam pasarih ah Khaikam gate an lonh cang tiah an langhter.
Mipi ralkap Chin pasaltha hna Bawipa nih in huppeng ko hna seh, Khuami mipi hna zong ralring tein um cio hna usih. Ralhrang kawlralkap pawl Laitlang lei an rak kai tilonak a saupah cang. Asinain tutan ah an rak kai tthan. Arak kaimi pawl hna hi khoika hmun le hma dah an panh lai timi theih asi lo.
Relchap. Thantlang Kan Biakinn A Khanghtu Ralkap Pa Nih A Tialmi ca. Kanmah Chin miphun deuh kan biakinn in an khangh mi hi a tam bik. Biakinn mei khanghtu tu ah aa tel lengmang mi ralhrang Aung linn kyaw timi nih catlap in a tial ta mi pakhat lampi ah an hmuh mi a si, nain a min hi a deu a hman lai tiah an zumh.A ruang cu a min tak in a tial ahcun amah caah himnak a um lo cAh Aung Linn Kaw timi a man lai tiah an zumh. A tialmi chung ahcun kanmah Chin miphun kan biakinn deuh an khanghnak kong aa tel.
A ruang cu Thantlang inn khangh mi chung ah hin naite ah biakinn an khangh mi hmuh le theih khawh lengmang a si. A tanglei bantuk in a tial ta i lampi ah a hlawt ti a si. Kanmah ralhrang chung ah hin a felmi kan tam ngai ko. Nain kan fel ko zongah kanmah duhning in rian tuan khawh le cawlcangh khawh a si ti lo caah mipi nih nan kan theih thiam lo tiah a ti. Cunglei kan bawi pawl nih mah kha tuah u kha kha tuah uh an timi kan tuah lo ahcun kanmah hi dantat kan tong caah kan tihtuk bu le kann ngamh lo bu in kan tuah mi a tam tuk tuk e a ti.
A bik in tulio kan bawi le nih kan umnnak hmunhma chung ah an kan cawmpiak bik le kan duh na lo bu in an kan tuahter mi cu mipi harsatnak pek hi a si ko. Mipi hi zeitluk in an lungdongh khawh tiah nan tuah hna lai. Mipi an lungdonghtuk ahcun kanmah lei ah an rak i mer lai i uknak hi kan duh ning in a si kho lai tiah hramhram in an kan cawnpiak tiah a tial. Cun Myanmar ram chung ah hin Khrihfa biaknak le a dangdang biaknak Budish biaknak a si lo mi poah hi nan hnuarsuan hna lai.
Myanmar ram chung ahcun budish biaknak pakhat lawng a um ahcun kan ram hi kan duhning piin kan kalpi khawh lai. Biaknak dang pawl an biakinn in hi target in hrawh le khangh nan i zuam lai tiah an kan cawn piak.Kan hnu a liamcia thlahnih hrawng ah khan Chin ramkulh ka um lio ah biakinn hi hramhram in kan bawipa nih a kan khangh ter.
Kanmah nih kan biakinn kan tihzah tuk bantuk in an biakinn hi an tihzah tuk mina si ve tiah kan hngalh ko nain kan bawi le pawl nih hramhram in khangh uh an kan ti i kan tuah lo ahcun kan nunnak a him ve lo caah duhlo bu tein kan khangh ton.Khi bantuk in cunglei nih hramhram in kan duhlo mi an kan tuahton caan ah hin zaam ding in aa tim mi kan tam tuk. Nain kan duh ning in kan zaam khawh lo caah tihbu le thlerh bu tein bawi le tangah kan i hne ko. Kan ram hi tha seh tiah kan duh tuk ve ko tiah a tial ta. Credit: Chokhleipar.
Leave a Reply