Hakha khua, Cawbuk gate ah kahdohnak a chuak. Chin ramkulh, Hakha khua, cawbuk sang ah a ummi gate ah May 18 zaanlei sml 6:30pm hrawng in kahdohnak a chuak tiah theih a si. Cawbuk sang ummi pakhat nih “Zaanlei sml 6:30pm hrawngah kahdohnak a chuak. Kahdohnak hi sml cheu hrawng a rau lai.
Kan umnak inn hmai le phungki sianginn thlang ah a ummi bawlung certual ah hriamngan a tla. Gate a hngakmi SAC chungtel pawl an hrum ai thawng zong aa thei” tiah The Chinland Post ah a chim.Cawbuk gate hi Chin ram kahdohnak aa rak thok hmasa biknak hmunhma a si i cu lio kahdohnak ah SAC ralkap 5 an rak thi. Credit: TCP
Thawngpang dang. KNLA le a hawi le hna nih ralhrang sakhan an laknak ah an zamtak mi hriamnam tamtuk an lak. Nizan May ni 17 ah Thailand ramri Myawaddy peng chaklei ah a ummi ralhrang kawlralkap sakhan Thae Baw Bo camp cu KNLA le a bawmtu hna nih an kah lak. Hi kahdohnak ah ralhrang nih helicopter zong an hman.
Culawng siloin raltuknak vanlong le CH 3 Drone hmangin an kah hna. An kahmi hi voi 20 renglo cu asi lai tiah an zumh. Ralhrang hna cu an thih tuk tikah tthenkhat cu an sakhan an zaamtaak tiah an langhter. Hi sakhan laknak ah mipi ralkap lei in minung pakhat cu a tlawmbik an thi tiah theih a si.
Tutan sakhan laknak kongah kap hnih in a thimi zat siseh hriamnam an lakmi zat fiangtein thanhnak an tuah rih lo. Mah sakhan hi Myawaddy-Lay Kay Kaw-Phlu-Thae Baw Bo-Wallay Myaing lampi ah a ummi a si i, Ralhrang LIB 559 an umnak hmun a si tiah an langhter. Cun mah sakhan hi kum 1990 ah ralhrang nih an rak lak i kum 32 a luan hnu ah KNLA le a hawi le hna nih an lak tthan mi a si.
Leave a Reply