Tuni June 11 ah ralhrang kawlralkap nih Hakha ah Nungak Van Lal Par an tlaih tiah thawngtheih a si. Hi kong hi anmah ralhrang kawlralkap hna nih thawngzamhnak an hmanmi Fifty Two News nih a langhter. CDF he pehtlaihnak a ngei mi nu pakhat kan tleih tiah an langhter.
Ralhrang nih an tlaihmi Nungak Van Lal Par hi Thantlang peng Dawn khua mi a si. Amah hi Hakha in Yangon lei kal aa tim i, Hakha Maan Bus ah a cuang. Ralhrang nih an gate ah an tlaih hi a si. Hakha CDF he pehtlaihnak a ngeimi pakhat kan tlaih. Tuni suimilam 11 ah Hakha in Yangon lei ah kal aa timmi,
Hakha Maan Bus aa citmi chungin checknak an tuah ah an tlaih mi a si. A phone kan zoh tikah CDF ralkap uniform aa hruk lio hmanthlak zong a um tiah an thanh. Ralhrang kawlralkap nih Uniform he hman aa thlami an tlaihmi hna hi an tlawm ti lo. Cucaah ramchung a ummi hna nih i ralring taktak hna usih.
Thawngpang dang. Kanpetlet peng kahdohnak ah SAC ralkap 9 an thi. Chin ramkulh, Paletwa peng, June 9 ah thazang 185 he kahdohnak a tuahmi SAC ralkap le CDF-Kanpetlet phufonh hna cu Latmon khuapawng ah kahdohnak voi 2 a chuak i SAC lei in 9 an thi tiah CDF-Kanpetlet nih thawng a thanh.
Cu SAC ralkap pawl cu CDF-Kanpetlet, The Youth Force (Saw, Kyaukhtu), PDF-Nyaung, PDF-Saw battalion 2 (YFPA) hna fonh in zinglei sml 10:00-11:00am tiang voikhat, zaanlei sml 5:00-6:00pm tiang voikhat tiah kahdohnak voihnih an kah hna i SAC ralkap 9 an thi i hliamhma a tuarmi zong an tam tiah theih a si.
Cu kahdohnak voihnih ah CDF-Kanpetlet phufonh hna lei nih hliamhma tuar lo tein an kir kho tiah theih a si.SAC ralkap pawl nih Latmon khuami hna cu hostage caah an tlaih hna. SAC ralkap pawl cu Latmon khua mipi zuatmi saṭil hna an thah i an ei lengah Latmon khua chaklei ah hmunhma an khuar caah kahdohnak a chuak kho rih tiah CDF-Kanpetlet nih thawng an thanh.TCP
Leave a Reply