SAC Ralkap Nih Gangaw Peng le Zotung Lei ah Rallam An sial I Khuami 30 Hrawng An Tlaih Hna!: Magwe ramṭhen, Gangaw peng in Chin ramkulh Matupi peng Zotung ram lei ah SAC ralkap hna cu July 24 in hmunhnih ah rallam sial in khuami 30 hrawng an tlaih hna, tiah theih a si.SAC ralkap hna cu Zotung ram, Zungnat khua in Tilaw khua lei ah rallam hmunkhat in an sial.
Cun Gangaw le Zotung ramri Zipia, Antta le Ramsi khua lei ah lut in Ramsi khuami 30 hrawng an tlaih hna, tiah Supreme Council CDF-Zotung in ṭuanvo ngeitu pakhat nih a chim. Ṭuanvo ngeitu nih cun, Hmunhnih in rallam a sialtu SAC ralkap hna cu minung thazaang 80 hrawng an si i, phu khat cu Ramsi khua pawnghrawng chekhlatnak le thianhhlimhnak an tuah dih hnu ah Ramsikhuami 30 an tlaih hna, a dang phu khat cu Tilaw lei ah an kal,” tiah a chim.
SAC ralkap hna nih rallam an sialnak lampi Zipia le Antta khua kar ah aho si theih lo miruak 2 hmuh a si i, SAC ralkap kut in nunnak liammi an si lai.Rallam sialtu SAC ralkap phu khat cu Ramsi khua pawng ah cawlcanghnak an tuah i, a dang phu khat cu Tilaw in Rezua – Matupi lei hoih in an kal lai tiah zumh a si,” tiin Supreme Council CDF-Zotung in chimphuannak nawlngeitu nih cun a chim.
Tualchung mi hna cu SAC ralkap rallam sialnak hmunhma ah khualtlawng lo ding in le um kallo ding in Supreme Council CDF-Zotung nih ralrin peknak zong an thanh cang. SAC ralkap hna nih cun a luancia July 20 in Gangaw le Htilin peng phone line le internet line an thah caah tualchung thawngpang le thil sining fiang in theih khawh a si lo. Credit: The Chin Post.
Thawngpang dang. Hakha Peng, Tilak Khuami an Zapi Ngawt in Khua dangdang ah an Zaam Hna. Hakha peng, Tilak khua ah SAC ralhrang pawl an phanh caah khuami an zapi ngawt in khuadang ah an zaam hna, tiah a zaam vemi Tilak khua upa pakhat nih The Chin Journal ah a chim.
Cacawn ninga ni (July 22) ah khan kan khua ah an rak phan. Zarhte ni ah kan khua in an chuak i, a thaizing Zarhpi ni ah an rak kir tthan. Zarhpi ni i kan khua an rak phanh tthan ah cun khuachung hmun kip ah hmunhma an la, meithal zong a kan puah hnawh len caah khua ah kan um ngam ti hna lo. Khuami thilri an lakmi a um len pin ah innzuat sattil an duhduh in an i thah.
Atu hi cu kan khuami zatuak in 90% hi cu kan zaam dih cang hna,” tiah a chim.SAC ralhrang pawl Tilak khua an phanh lecangka in miphun ralkap pawl an i ton tawnnak inn pakhat an luh hnawh colh caah Tilak khua ah ralhrang thawngpetu an um kho tiah an ruahdamh.Nihin July 28 zinglei tiang ah cun i kahdohnak a um lo bang in tlaihkhih a tongmi zong an um lo.
Tilak khua cu Gangaw peng Daidin (Shungshi) khua he meng 10 a hlatnak ah a ummi a si i, khuami a tam u cu Daidin ah an zaam hna. Daidin ah a phanmi sayama pakhat nih, “Nizan le nihin zing tiang minung kan i rel ning ah cun Daidin ah hin minung 300 hrawng kan phan lai. Cun khua dangdang ah a pikpak in a zaammi an um ve hna,” tiah a chim.
Tilak khua ah inn 120 hrawng a um i milu hi 500 in 600 karlak an si.Tilak in Laitlang lei kap ah a ummi Keizuan khuami hna zong ralhrang an rak phak sual ah tiin thinphang in an um hna. Keizuan khua upa pakhat nih, “Atu tiang hin cun kan khua ah an rak phan rih lo. Laitlang lei an rak kai ahcun kan khua hi an pal khawhmi a si. Zaam ding in kan i tim ve ko hna,” tiah a chim.
Tilak ah a phanmi SAC ralhrang pawl hi khoika lei ah an kal timi khuami nih an thei kho lo. Gangaw pawng khuate ah a ummi minung pakhat nih, “July 18 ah khan Tilak lei ah ralkap pawl cu kal an i thawh. Mah ni thawk khan Gangaw peng chung phone thah hram an thawk. Ralkap hi 100 hrawng an si. Tilak khua in an chuak cang an ti nain nihin (July 28) zinglei tiang ah cun Gangaw lei ah an rak kirmi kan hmu hna lo,” tiah a chim. Credit: The Chin Journal.
Leave a Reply