Breaking News. Kalaymyo, Dum khua cu ralhrang kawlralkap hna nih hriamnam ngan in an kah pin ah ralzam umnak camp an khangh. Tuni May ni 22 zanlei ah hriamnam ngan in ralhrang hna nih Garden khua cu voi 50 renglo an kah. Ralzam umnak sakhan 80 renglo zong an khangh tiah theih a si
Hi konghe pehtlaiin Dum khua mi pakhat nih a chimmi cu Kyigone Kyauk Khok in ralhrang kawlralkap hna cu Inkyaw khua ah zanhnih an riak i zing ah Dum khua lei an rak panh. Ralhrang kawlralkap hna nih ralzam hna umnak an phak ah khuami hna cu ramtang ah an zam hna.
An thilri vialte hna cu an chiahta hna. Ralhrang kawlralkap hna nih Kanpale Asihkhua in hriamnam ngan an rak kah hna. An rak kahmi hriamnam hi ruahsur in a sur i, mipi zong zong a himnak hmun ah an kal a hau ko tiah a chim. Ralhrang hriamnam ruangah minung pathum zong hliam an tuar tiah theih a si.
Thawngpang dang.Chin Ralzaam tamdeuh an zawtnak cu lung a fak hringhran ko. Ralhrang ruangah hi zawtnak hi aa thokmi ti uh sihlaw kan palh lai lo. Chin ralzam chungah minung tam deuh cu thinlung lei damlonak an ngei tiah an langhter. Kawlram buainak ruangah Mizoram ah ralzam dirhmun in khua a sami hna thinlung lei dam lonak an ngei.
Hi konghe pehtlaiin ralzaam bawmtu pakhat nih a chimmi cu damlo bantuk in an i thei hna. Kan check tik hna ah zawtnak ngeimi an um lo. An hmuh tonmi ruangah siseh, an thinlung ah a himlo tibantuk ruahnak an ngei. A herh lomi khuaruahnak ruang zong ah si kho mi a si.
Thinlung lei ah harsatnak an ngeimi an tam ngaingai tiah a chim. Mizoram ah ralzaam dirhmun in khua a sami hna hi minung thong 40 hrawnghrang an si. Cu hna cu NGO le Khrihfabu tlawmngai siseh ramleng lei in bawmhnak in zohkhanh an si. Cun mizoram cozah zong nih fakpi in ralzam hngakchia hna ca cawn khawhnak tiangin an tawlrel piak ti a si.
Leave a Reply