Khualeng ah i Kah Ding in CDF-Hakha nih SAC Ralhrang Challenge. Sualnak ngei lo mipi khawndennak a um lo nakding khualeng ah i kah ding in CDF-Hakha nih nihin August 10 zaanlei ah SAC ralhrang cu an hun zuamcawh hna. SAC ralhrang nih nan ngamh taktak a si ahcun mipi innlo le nunnak a hnorsuan lo nakding hmun khualeng ah rak chuak u law kan i kap hna lai,” tiah cathanh ah an langhter.
SAC ralhrang ruang ah Hakha peng chung ah inn 30 hrawng a kaang cang i, minung 6 zong an nunnak a liam cang, tiah an langhter.Ralhrang nih mizapi cung ah an kan tuahto ning hi ruah tik ah lung a fak ko. Cucaah, mizapa kut ah rampi nawlngeihnak a phak hlan tiang lungrual tein Min Aung Hlaing le a ralhrang ralkap hna hi doh ti hna u sih,” tiah mipi sin ah sawmnak zong an ttial chih.
Hakha-Thantlang karlak Timit ah ral lei entainak a linhsat bang in aluancia August 2 thawk khan Hakha khuachung le khualeng ah CDF-Hakha ralkap hna nih kahdohnak pehzul in an tuah. Nihin August 10 zinglei zong ah Hakha vuanci inn ah hmun a khuarmi SAC ralhrang le Khayaing palik zung i SAC ralhrang pawl cu CDF-Hakha nih an kah hna.SAC ralhrang nih miakpi in Hniarlawn lei ah voi 2 an kah i, Hniarlawn khua Block (1) ah a ummi inn pakhat chung ah a tlak caah Pi Chia Hnem a nunnak a liam, tiah thawngpang kan theih. Credit: The Chin Journal.
Cathanh Dang. Mizapi Umnak Lei Hoih In Hriamngan Kahnak Kongah Duhlo Langhternak. 2021 February 1 ni thok in mizapi sin in uknak an kan chuh i rampi ngawlngaihnak hramhram in a lami Min Aung Hlaing le a ralhrang ralkap hna nih mizapi umnak hmunhma lei tinh in hriamngan duhpaoh in an kah mi cungah CDF Hakha Council nih fak piin duhlonak kan langhter.
2022 January 9 ah ralhrang nih Rungtlang in hriamngan an kah mi cu Nabual khuachung ah a tla i inn, lo a rawh pin ah nu pakhat hliamhma a pu. 2022 March 6 ah ralhrang kahmi hriamngan, Hniarlawn khuahlun khuachung ah a tlak ruangah nu pakhat hliamhma a tuar.
Cun 2022 August 10 ah ralhrang kahmi hriamngan nih Hniarlawn khuahlun Pi Chia Hnem inn cungah a tlak caah a nunnak a liam. Hakha peng chung ah ralhrang kut in inn 30 leng a rawk i mipi 6 ralhrang kut in an nunnak a liam. Ralhrang nih mizapi cungah an kan tuahto hi ruah tikah lung a fak ko. Cucaah mizapi kut ah nawlngaihnak a phak hlan tiang lungrual tein Min Aung Hlaing le a ralhrang ralkap hna hi doh ti hna usih.
Cun CDF Hakha cu mizapi humhim kilvennak caah dirhmi a si bantuk in ralhrang nih mizapi tlerhnak caah mizapi lei hoih in hriamngan a kah mi hi fak pi in kan doh. Hi hnu hmailei cu fak deuh in hma kan lak cang lai caah mizapi zong fimkhul tein thut dir i umkal i ralring hna usih tiah CDF Hakha Council nih cathanh an chuah.
Leave a Reply