Timit Kahdohnak Ah CDF-Hakha Sniper Nih SAC Ralkap 3 A Thah Hna: Chin ramkulh khualipi Hakha pawng Timit kahdohnak ah SAC ralkap pawl cu Chin hriamtlai phu nih an kah hna, tiah theih a si. Cu kahdohnak ah cun CDF-Hakha sniper nih ralkap 3 a thah hna pinah seh meithal (Machine Gun) tlaitu pa zong an thah caah ralkap cu um awk hngal loin an tuah hna.
Chin hriamtlai lei in a thimi le aa hliammi an um lo, tiah theih a si. Nithum chung kahdohnak cu Hakha Campaign For Justice nih a ti bantukin hin an langhter.August 3: Chun ni tlak i kahdoh ah kan hmuithiam ‘CDF-Hakha sniper’ nih Ralhrang 3 a thuat hna.
Ralhrang lei Machine gun a tlaitu zong hrilh a si caah an con ngai ngai. Rungtlang lei in hriam nganmi in bawmhnak an pek hna. Cu ni ah Ralhrang 4 an thi. August 4: Cawbuk Gate ah zing 10:45-11:06 caan karlak ah va kah a si i Ralhrang 1 a thi, 3 hliam an si.
Timit lei cu ‘meter 200’ tluk ihlat lawng in kahdoh an si i Ralhrang 8 an thi. Cun an buk ah va kalhnawh in va kah an si chih caah hliammi an tam ngai ko. Kan hmuithiam ‘Sniper’ nih a hrilhmi hna (1) a fiang, pahnih a fiang rih lo. Rungtlang in le Thantlang lei in hriamngan in bawmhnak an pek hna, tiah CDF-Hakha nih an thanh.
Thawngpang dang. Tamu-Kalay Lam Cung Bomb Puahnak Ah SAC Ralkap 20 Hrawng An Thi.Tamu in Kalay lei a kalmi SAC ralkap 60 hrawng le motor run 24 cu bomb fimhlawm dingah hmai ah an rat caah Kalay peng, mengtung 55 pawng ah August 4 zing sml 11:00 hrawng ah bomb kan puahhnawh i, ralkap 20 hrawng an thi, tiah PDF-Kalay nih cathanh an chuah.
Bomb kan puahhnawh hna hnuah SAC ralkap nih an pawngkam um khuami cheukhat cu an tlaih hna. Zanlei sml 6:30 hrawng ah SAC ralkap nih Yarsagyo khuachung cu hriamngan an kah tuk caah CDF-Tonzang, PDF-ZaJu le PDF (Kalay) he kahdohnak a chuak, tiah theih a si. Credit: The Chin Post.
Leave a Reply