CDF HI ZEI RUANGAH DAH CNA AH NAN LUH KO LO? AA RALBAWI

AA ralbawi simi Htun Myat Naing nih Chinmi kan dohthlennak kong ah ka lung nan fiang lo tiah an sin i Matu CDF pawl training a va kaimi hna sin ah a chim tiah Ngun Tha Tling nih facebook a cahmai ah a langhter. Htun Myat Naing nih a chimmi ruah lo awk ttha lo bak cu si ve. A chimmi cu a tanglei bantukin a si.

Chin miphun nih zalonnak le luatnak nan hmuh khawh nakhnga Chin National Front and Army tiah kanmah hlan piin an rak dir. Nain ralkap thazaang an tthawng tuk loh. Phaisa thazaang an der thawm deuh ca zong ah si men lai. Interview an rak ka tuah lio zong ah ka rak chim cang. CNF/A hi Chin miphun nih thazaang pe hna uh.

Phaisa tampi tho uh. Pa a simi paoh CNA ah lut dih uh. Ralkap thazaang a tthawn paoh ahcun kan dohmi ral nih an kan ttih deuh ko lai tiah ka rak chim bal. Nain Chinmi nan cawlcangh ning le nan dohthlennak hi ka lung nan fiang bak loh. Min Aung Hlaing nih uknak hramhram in an vun lak i, heh tiah dohthlennak ah hriamnam i put in CDF tiah nan dir i, phaisa thazaang zong CDF caah tampi phaisa an pek tiah thawng ka theih.

Hihi ka khuaruah a har tuk. Kum caan saupi dohthlennak hriamnam a rak tlai cangmi CNF/A ahhin zia nan um dih ko lo. Atu nan dohthlennak hi miphun dawtnak ngei in hriam nan tlai. Chinmi nih heh tiah phaisa tampi nan thawh. Miphun nan dawt caah si tiah ruat usihlaw ziah CNF/A nawlngeihnak tang um loin nan i tthek dih. Nan dohthlennak ahhin teinak taktak in hriam hi nan tlai maw tlaih lo timi hi ka lung nan fiang loh. Zeiruang bik ahdah mah ti hin nan um timi nih khua tampi a ka ruahter tiah a ti