CDF-Matupi Nih Nihnih Chung Kahdohnak Ah Athi Mi Zat An Thanh

Nihnih Chung Kahdohnak Ah SAC Ralkap 7 An Thi Tiah CDF-Matupi Nih An Thanh!: Chin ramkulh Matupi peng Lailenpi khua in Matupi lei ah ke in rallam a sialtu SAC ralkap le CDF-Matupi karlak kahdohnak voi 3 a chuak i, cu kahdohnak ah cun SAC ralkap 7 an thi i, hliamhma tuar mi zong an tam ngai, tiah CDF-Matupi nih cathanh an chuah. A voikhatnak kahdohnak cu July 6, zinglei suimilam 9:00 hrawng in a si i, Ringkhan (ရဲန်ခဲန်း) khua le Ammilai (အမ်မိလိုင်း) khua karlak ah kahdohnak a rak chuak i, cu kahdohnak ah cun SAC ralkap 3 an thih lengah 2 faak ngai in hliamhma an tuar, tiah theih a si.

Cu ni zaanlei ṭhiam ah cun kahdohnak a chuak ṭhan i SAC ralkap 2 an thi ṭhan, tiah theih a si. SAC ralkap lei nih cun, hliam tuar le a thi mi an tam caah Mizapi ralkap lehrulhnak ah Ringkhan (ရဲန်ခဲန်း) khua inn 3 cu an rak khanghpiak hna. Cun, July 7 ah CNA, CDF-Matupi, CDF-Zotung phufonh le SAC ralkap hna cu Ammilai (အမ်မိလိုင်း) khua ah a voithumnak an i kap ṭhan i, cu kahdohnak ah cun SAC ralkap lei in 2 an thi ṭhan, 6 hliamhma an tuar tiah CDF-Matupi nih cathanh an chuah.

Lailenpi in Matupi lei ah ke in a kal mi SAC ralkap hna cu Ammilai (အမ်မိလိုင်း) khua ah an um rih ko, tiah CDF-Matupi in ṭuanvo ngeitu pakhat nih a chim. SAC ralkap pawl cu 100 hrawng an si lai tiah zumh a si. RELCHAP: Moreh Ah India Special Force An Phan! India mi pahnih cu Myanmar ramchung Tamu khuapi ah thah an tong tiin thawngpang a linhsat lio ah, India ramchung Manipur ramkulh, Tengnoupal peng, Moreh khuapi ah nihin July 7, zaanlei suimilam 3:30 hrawng ah India special force a phortu helicopter pakhat a ṭum, tiah theih a si.

Cu helicopter cu ramri hmunhma hrawng in a zuan hnu ah Moreh khuachung ah a ṭum ṭhan, tiah theih a si. Moreh khuami pakhat nih a chim ning ah cun, “Tamu pyusawhṭi kut in nunnak a liam mi India rammi pahnih hna kong he pehtlai in thlahmi an si lai,” tiah vanlawng zuang he pehtlai in a ruahnak a chim. Nizaan July 6, thok in Tengnoupal peng uktu (District Commissioner) nawl peknak lawng in India rammi hna cu Myanmar ramchung lut ding in le Myanmar rammi hna zong nawlpeknak a um lawng ah India ram ah lut ding in cathanh a chuah.

Nihin July 7, zinglei ah cun Moreh khuachung dawr cheukhat lawng an i ong i, tam deoh cu dawr an khar, tiah theih a si. Myanmar ram Tamu in thil cawtu hna cu India ram lei luhnak nawl a um ti lo caah ralzaam dirhmun in ummi hna ca ah cun cuhlan bantuk zalong tein umkal a har ngai, tiah tualchung mi pakhat nih a chim. Crd. The Chin Post.