Mizoram Ah Ai Dormi Ralzaam Mizapi Nih Rithaisii Zuarthlainak An Tuahmi Kongah Chinland Ralkap Phu 6 Fonh Nih Cathanh An Chuah.Lawngtlai 22 Vaupi 2022 : Myanmar ram ah a cang cuahmah mi kahdohnak ruangah India ram, Mizoram ramkulh ah ai dormi hna nih rithaisii zuarthlainak an tuah ti thawngpang a len hnu ah Chinland ralkap phu 6 nih rithaisii zuarthlainak tuah lo dingin ralrinnak cathanh 21 Vaupi 2022 ah an thanh.
Chinland ralkap phu 6 fonh hna cu Chin National Front(CNF/A), Chin National Organization (CNO/CNDF), Hualngoram Peoples Organization (HPO/CDF- Hualngoram), People Defence Army(PDA) , People Defense Force (Kalay) (PDF Kalay), Zomi Federal Union (ZFU/PDF Zoland) hna nih cathanh an chuah hi a si.
Myanmar ralzaam mizapi nih rithaisii zuarthlainak an tuah ti thawng kan theih tikah kan lung a nuam lo, ralzaam mizapi chung in a tu bantuk rithaisii zuarthlainak a tuah mi hna nih tuah ti lo dingin ralrin kan in pek hna, rampi le miphun dawtnak ngei lo in rithaisii zuarthlainak a tuahmi cu tlaihkhihnak tuah nan si lai tiah an thanh.
Mizoram mizapi nih Myanmar ralzaam mizapi cungah nan dawtnak nan langhter mi le nan zaangfahnak cu kan i cinken peng lai, Mizoram chungah zeitik tiang um rih a si lai theih a si lo caah nan dawtnak langhter hram rih ulaw, Myanmar ram zong a rannak in zalonnak a hmuh khawh zau nakhnga kan bawmchan hram rih u, tiah sawmnak zong an langhter.
Ralzaam mizapi hna zong nan phanh umnak khua ah santlaimi si i zuam cio hram u, tiah forhfialnak zong an thanh. Sagaing ramthen le Chin ramkulh chungah kahdohnak a chuah hnu in Mizoram ah ai dormi Chin ralzaam ( 29532) an phan tiah theih a si. Credit: The Lairam Times
Leave a Reply