CNF/CNA Thithruainak in Cawlcangh ding in CDF-Zotung nih Bia an Chah. CNF/CNA tthithruainak in cawlcanghnak ngeih ding in CDF-Zotung Organization, Supreme Council nih biachahnak kan ngei, tiah nihin July 23 ah CDF-Zotung nih phungning in thawngthanhnak an tuah.
Kan ralkap pawl CNA sin ah raldoh cawn ding in thlah i raldoh cawnnak tlamtling an ngeih hnu ah kanmah hmunram ah kir in rianttuan ding in CNA upa hna he hnatlaknak kan ngei,” tiah CDF-Zotung nih an langhter. CNF cu nucan le pacan ralkap bu bantuk in bochan ding in ahramthok tein
CDF-Zotung nih dirhmun kan rak ngeih cangmi zong a si, tiah an langhter chap. Atu bantuk in hnatlaknak an ngeih cang caah CDF-Zotung ralkap pawl hi CNA sin ah raldoh cawn ding in le CNA he hmun khat ah ramrian ttuan ding in thlah an si lai. Credit: The Chin Journal
Hakha Thawngpang. Hakha SAC Ralhrang Meithal a Zaampitu Mino Pa i a Pule Inn an Chuh Hna. Nihin July 23 ah Hakha, Khuathar sang ah a ummi Pu Man Thar te inn cu SAC ralhrang nih an chuh hna i an inn kutka ah catar zong an benh. SAC ralhrang nih Myanmar ram uknak an chuh hnu, CDF an dirh ka hrawng ah khan Pu Man Thar te i an tupa te nih SAC ralhrang pawl zu a dangh hna i an rit karlak ah meithal pakhat a lak i a zaampi khawh.
Thil sining a theitu minung pakhat nih, “CDF an rak dirh ka hrawng ah khan a si. An tupate nih ralkap pawl aa komhter hna i zu a dangh hna. Zu an rit karlak ah an meithal pakhat a lak i a zaampi. Cu caan thawk cun ralkap nih an chungkhar hi an kawl lengmang hna,” tiah The Chin Journal ah a chim.
SAC ralhrang meithal a zaampitu Hakha mino pate hi himnak hmun ah a phaknak a sau cang. A pule Pu Man Thar te zong Hakha ah um loin hmundang ah an zaamnak a sau ngai cang, tiah thawng kan theih. Credit: The CHin Journal
Leave a Reply