CELH A SI LO E, RALHRANG NIH HNGAKCHIAPA AN HREM NING A FAKTUK E

SAC Ralkap Nam In A Sawhtu Ngakchia Pate Cu A Hliamhma he Ralkap Nih An Hrem!
Bago (ပဲခူး) ramṭhen, phyi (ပြည်) peng, Hmawza(မှော်ဇာ)khua Sianginn pakhat ah tang 7 a kai liomi, kum 14 ngakchia Awng Myint Myat, SAC ralkap nam in a sawhtu cu meithal kahnak hliamhma he siizung ah thlopbul a si i, a hliamhma a fah ngai caah a tha a der ngai tiah theih a si.

Meithal kuan nih cun a hnakpang ah a khen i a thi tam ngai a chuak.Innkhan dang teah an chiah i, SAC ralkap nih cun a hliamhma he bia an hal i, an hrem chih. An tukvelhnak ah a hmai le a takpum cu an vual dih i, a nunnak caah thinphang a si ko, tiah tualchung thawnglatu nih an chim.

Thawngpang dang. Htawai Khuami Pakhat Cu Tlaih A Ton Hnu Nikhat A Rauh Ah A Ruak In A Chungkhar Nih An hmuh!: Tanintharyi ramṭhen, Htawai (ထားဝယ်) ah kum 51 tluk a si mi U Soe Myint cu SAC kuttang um pyi-tuh-sit phu nih August 4 zaanlei ah bia hal ding in an auh hnu ah, nihin August 5 zinglei ah cun a ruak in hmuh a si, tiah Htawai khuami pakhat nih a chim.

U Soe Myint cu nizaan August 4 ah pyi-tuh-sit phu hna nih mi sawhsawh thuam i hruk in “Bia hal ding a um caah chikhat in kan zul ta” tiah an auh. Nihin August 5, zinglei ah cun a ruak hlam ding in chungkhar an thanh hna, a ruak cu Htawai peng Palukung khua pawng lamkam ah an hlonhtak” tiah khuami pakhat nih cun a chim.

U Soe Myint te chungkhar cu Htawai, Bamaw sang i an umnak kum hnih hrawng lawng a si rih, tiah khuami nih an chim.U Soe Myint thah a tonnak kong ah SAC ralkap lei nih cathanh an chuahmi a um rih lo. Htawai ah SAC ralkap uk duh lo langhternak a tam chin i, i thahnawnnak zong a tam chin, tiah tualchung mi nih an chim.

Tanintharyi ramṭhen chung a cangmi thilsining hlathlaitu phu pakhat ‘Southern Monitor’ nih cun, Tanintharyi ramṭhen chung ah June 2021 in June 2022 tiang ah kahdohnak voi 116 a chuak i, voi 119 bomb a chuak. Thahnawnnak tiang a chuahpi mi buainak voi 173 tiang a um, tiah an langhter.

AAPP nih cazin an langhter ning ah cun SAC ralkap nih uknak an lak thawk in August 4 tiang ah, democracy hmuhkhawhnak ding ah cawlcanghnak a tuahtu hna hna chung in minung 2157 nunnak a liam, cang tiah an langhter. Credit: The Chin Post.