Cheuhra cheukhat Kong. Chawva le pekchanhnak paohpaoh hi thlarau nun he aa pehtlaimi a si. Phaisa kawlnak, thluachuah hmuhnak lam kawlnak an si lo. Thlarau nun puitlinnak lei lam pakhat tu a si deuh.1/10 hi Khrihfa zumhnak ah a theipar le a zik a si lo. A hram tu a si deuh. Cheuhra cheukhat (1/10) Peknak Umtuning.
Pakhatnak. Cheuhra cheukhat (1/10) peknak cu Phungbia hlan in a um cangmi a si. Abraham nih a pek (Ge.14:20), Jacob zong nih a pek ( Ge.28:22). Abraham le Jacob nih Pathian sinah an pekmi cheuhra cheukhat hi Phungbia tang an um ruangah a si lo. Phungbia an zulhmi zong a si pek lo. An mah lungtho tein, lunglawm tein, siang tein, hnekchom haulo tein le ichirnak umlo tein an pekmi a si. Pathian vel an tin comi cungah lawmhnak in an pekmi a si. Cucu Pathian nih a cohlan mite a si ko.
Pahnihnak. Moses chan ah Pathian nih Cheuhra cheukhat pek cu Phungbia in a feh ter. ( Lev.27:30). Cun Profet Malakhi le profet dang hna zong nih an fehtermi a si ( Mal.3:8-10).Jews miphun hna nih 1/10 an pek ning hi phun thum in a um. Hihi philhlo ding a si. (A). Pathian caah kumkhat voikhat an pek ( Lev.27:30-33). Hihi Biakinn rianțuantu Levi miphun nih an tin comi a si. (B). Sifaak hna caah kum thum ah voikhat an pek (Deut.26:12-15). (C). Jerusalem puai caan ah anmah lila nih eidingmi an pek rih ( Deut.12:5-19).
Jesuh Khrih chan a hong phan i cheuhra cheukhat pek hi Jesuh nih a doh lo. Matthai 23:23 na rel ahcun Jesuh nih 1/10 pek a dohnak na hmu lai lo. Daithlan loding a ti lehlam. Farasi le phungbia cawnpiaktu an lungput le an ziaza tu a mawhchiatmi hna a si. 3. Biakam Thar (NT), Velchan a phak hnu zongah 1/10 pek ding le peklo ding a um lo. Khrihfa peknak kong ah cun Paul nih 2Kor.8-9 chungah khin tampi a chimmi a um. Nain 1/10 kong a si lo. Peknak ah kan lungput kong tu a chimmi a si.
Judea ram a ummi zumtu hna nih Mesidonia ram Khrihfabu hna sin ah bawmhnak an pekmi hna kongtu a si deuh. Cu an peknak ah cun hnekchom, ngaihchihbu le fialbu in peknak siloin mah le lungthleh ning cio in, lungtho tein le lunglawm tein pek kha a forhfialmi hna a si. Cucu Abraham he, Jacob he, cun zumtu tampi nih an pekning cio cu a si ko.
Phungbia an zulh le Phungbia tang an um ruangah an pekmi a si naisai lo!!! Cu lungput cu zumtu vialte nih 1/10 si zongah, thawhlawm peknak si zongah, sifaak santlailo ca peknak si zongah, zei bantuk peknak paohpaoh ah kan ngeih dingmi lungput kha a si awk a si ko. 1 Kor. 10 chungah OT chung i Israel pawl tuanbia le tuahsernak pawl a chia he, a țha he țial a sinak cu kan i zohchun awk caah a si a ti.
Cucaah thilțha a simi paoh (1/10 telhin) kan cawn hna zongah sual a si lo. Palh zong a si lo. A dik lomi zong a si hrimhrim lo. 1/10 si zongah, peknak dang kong a si zongah kan ruah ding cu: i. Peknak paohpaoh cu, 1/10 zong, Pathian kan dawtnak le kan ipeknak thinlung in a si awk a si. ii. Peknak paoh hi, 1/10 he, Pathian thluachuah hmuhnak caah ” ziknawh” a si lo. Asinain cheuhra cheukhat pek ruangah a sifaak chinmi tu cu ka hngal rih hna lo.
iii. 1/10 maw ; 2/10 maw ; 3/10 maw a si zongah na pek khawh zat paoh pe ko. Na pek khawhlo sual le, pek khawhlo caan um sual zongah Pathian nih dan a ka tat lai tiah ruat fawn hlah. iv. Peknak paohpaoh cu, 1/10 telhin, hnekchom in sihlah seh. Pathian vel le dawtnak ruat setmat te he lunglawm tein pe ko. v. Phungbia tang i a ummi Jews pawl hmanh nih an pek ahcun Vel tang i a ummi kan nih nihcun zeitluk in dah pekawk kan si chinchin ti hi ruat!!
Zumtu hna nih 1/10 le Thawhlawm Khrihfabu (Biakinn) ah kan pek hrimhrim awk a si zia le a țhatnak cu; a ). 1/10 le thawhlawm kan pekmi hin Biakinn le Khrihfabu rian țuantu hna kan zohkhenh hna le cawmnak a si. Paul nih ” Thawngțha chimtu hna cu a thawngțha chim in an paw an i cawm awk a si” a ti (1Kor.10:14). b). Khrihfabu cu a bu in rian țuannak a si caah 1/10 le thawhlawm in țuan a si. Missions rian zong a țuan, sifaak zong a bomh…tbk.
A herh caan ah a herhning in kan thawh ko lai, kan pek ko lai na ti ahcun hnekchom le fialchom hmanh a lo leh lam. Cutik ah a petu hna caah lawmhnak le thluachuah hna a um lo lehlam lai. Thawhbur a tamtuk tiah kai zai țhiam ko lai. c). Khrihfabu in chiatni țhatni a um caan ah kanmah lila thawhmi le pekmi kan hman ko. 1/10 he thawhlawm he ai tel dih.
Cucaah cun, peknak paohpaoh ( 1/10 telh) hi Phungbia tang na um ruang le Phungbia ning in na pekmi a si lo!. Biaknak minung men si ruangah pekmi zong a si lo. Na pek ruang ahkhan vanram na phan lai tinak zong a si pek fawn lo. Thlaraumi le piangthar hleipi na sinak hmelchunhnak zong a si hlei pek lo. Pek khawhnak caan, chaw le va le tha le zaang an petu Pathian tu kha lawm ko. Khrih ah nan Unau Ronald Ram Uk Cung.
Leave a Reply