CHINMI KAN FALE PAHNIH RALHRANG NIH AA KAN THAH PIAK EE

Paletwa Ah Sianggakchia Thlahtu Tilawng Cu SAC Ralkap Nih An Kah I Siangngakchia 2 Nunnak A Liam! Chin ramkulh Paletwa ah siangngakchia a thlah/dongtu tilawng pakhat cu SAC ralkap nih an kah caah siangngakchia 2 nunnak liam i, midang 3 hrawng hliamhma an pu, tiah khuami nih an chim.

Cu tilawng cu Paletwa peng Yimawah khua in Tungmawah khua sianginn ah nitin siangngakchia a thlah/dongtu tilawng a si i, nihin chun cu a kir lei ah Hnamada(နှမဒါ) khua tilawng dinhnak hmun ah umhmun khuarmi SAC ralkap nih an kah, tiah mit hmutu khuami nih an chim.

Cu tilawng chung ah cun siangngakchia 10 hrawng an cuang i, SAC ralkap kahnak in ngakchia 2 cu an nunnak a liam, tiah theih a si. SAC ralkap nih tilawng an kah hnu ah, cu tilawng cu tiva kam ah dirter in tilawng khaltu le sianginn rianṭuantu hna cu an tlaih hna i tilawng chung ah a ummi ngakchia zong bia an hal hna, tiah min langhter duh lo mi pakhat nih media ah a chim.

Tlaih A Tongmi MRRF Hruaitu Le Midang 4 Cu SAC Ralkap Nih An Thah Hna! SAC ralkap kut in tlaih a tongmi Myanmar Return Ranger Force (MRRF) hruaitu Bu Aung May le midang 4 hna cu August 1 zaan ah meithal kahnak in SAC ralkap nih an thah hna, tiah theih a si.

Kum 28 tluk a si mi MRRF hruaitu Bu Aung May le midang pa 4 hna cu SAC ralkap nih August 1, zinglei ah an tlaih hna hnu ah, Yangon-Mandalay lampi ah an kahthah hna, tiah Myanmar Return Ranger Force in ṭuanvo ngeitu nih media ah a chim.Bu Aung May cu a nunnak a liam cang, August 1 zaan ah an thah cang, a ruak zong an i kalpi. Tlaih a tongmi 5 dihlak ning in an nunnak a liam cang” tiah fehternak he a chim.

Bu Aung May cu August 1, zinglei suimilam 6:00 hrawng ah SAC ralkap nih private motor 5 he Mandalay, 86×8 lam a umnak inn ah an tlaih i, amah he an thah mi 4 hna cu “Bu Aung May he phukhat nan si” tiah an puh hna caah an thah ve hna, tiah theih a si. Credit: The Chinland Post..