Thla 6 Chung Chinram Kahdohnak ah SAC Ralhrang 900 Leng Thi. February-July 2022 tiang, thla 6 chung ah Chin ramkulh chung ah kahdohnak voi 220 a chuak i SAC ralhrang minung 927 an thi, tiah Chinland Joint Defense Committee (CJDC) nih thawngpang an chuah. Hi voi 220 kahdohnak ah CJDC chungtel ralkap hna chung in minung 53 nih an nunnak an pek ve, tiah an langhter.
Chin ramkulh chung peng 9 le CDF-KKG an cawlcanghnak hmunram chung kahdohnak fonh in report an chuahmi a si. CDF-KKG hi Chin ramkulh tlangcung si loin nelrawn (Kalay peng le Gangaw peng) ah a cawlcangmi an si nain CJDC chungtel an si caah atutan report ah an langhter chih hi a si.Thla 6 chung Chin ramkulh ah Mindat, Falam le Hakha peng ah hin kahdohnak a tam bik. Hakha peng ah voi 45, Falam peng ah voi 44 le Mindat peng ah voi 35 tiin a tam bik an si hna. Credit: The Chin Journal
Thawngpang dang.Regional Pelple’s Army phu nih Yangon region vialte lak dih dingin an i timhlamh ning an langhter cang. Yangon khuapi region dihlak hi kumkhat le cheu ah kan lak dih lai tiah thanhnak an tuah. Regional People’s Army hna cu phu 16 aa fonh mi an si. Hi phu 16 hna nih wave pathum hmangin Yangon lak an timhnak kong an langhter. Wave an thenning cu Rose Wave, Eagle Wave le Dragon Wave timi hmangin ralkap lei cawlcanghnak timhtuahnak an ngei dih cang.
Rose Wave nih hin bomb puah lei rian an ttuan lai i, Eagle Wave nih biatak tein puahkehnak lei thilri rian a ttuan lai i, Dragon wave nih Yangon khuapi adihlak in lak khawhnak ding rian a ttuan lai ti si.Mah Wave pathum hmangin Yangon Region vialte cu NUG cozah sin ah a pek tthan lai i, ralhrang kawlralkap vialte an dih dongh tiang an hramchah dih a si lai tiah theih a si. Hi konghe pehtlaiin Regional People’s Army phu chungin hruaitu pakhat nih a tanglei bantuk in mipi sin ah a langhter.
NUG cozah kut ah nawlngaihnak dihlak hi um seh ti kan duh. A donghnak bik Dragon Wave ah hin ralhrang kawlralkap hna cu Yangon Region in kan tthawl dih hna lai i, a dihlak in lak khawh dingin kan tukdoh lai tiah a chim. Hi khuapi chung dihlak ralhrang kut in laktthan dingah Wave pathum hna nih adoh tikah tlangcung hriamtlai hna zong bawmh kan hal hna lai tiah a chim chih.
Hi konghe pehtlaiin Revolution Force phu 16 fonh nih dirhmi Yangon Region People’s Army phu nih kan hnu zarh August ni 7 ah khan thanhnak an rak tuah cang. Tutan ah an dirhmi phu 16 hna hi tukum April ni 17 ah Yangon Region chungah ralhrang kawlralkap doh in hriam a tlaimi vialte phu 16 hna i fonh in an tuah dirh mi a s.
Leave a Reply