CNA CAMP LEI AN KALPI MI RALHRANG PATHUM AN ZAAM

CDM tuah mi ka si tiah CNA camp lei an kalpi mi ralhrang 3 an zaam. 2022 June 10 Chuncung khua luh lai ah tlaih an tong i bia halnak an ngeih dih hnu CDM tuah ding in a zaam mi kan si ti a chimmi ralhrang minung pathum hna cu CNA camp an phak hnu ah an zaam than tiah theih a si. An tlaih ning kong he pehtlai in CCN nih thawng kan hlat tik ah Hakha in an i thawh ah mipi nih CDF sin ah thawng a thanh hna.

Thawng thanh ning bantuk in CDF nih an va fuh hna. Ke in an kal i Haimual Jeep motor an kham i a cung ah an kai. CDF nih an hmuh hna tik ah a hnu lei in an zulh than hna i Chuncung khua luh lai ah an tlaih hna, tiah kan theih. Atu a zaam mi ralhrang hna hi an tlaih hna in CDM tuah ah a zaam mi ka si tiah aa chim mi an si. Zaan khatnak CNA camp an riah hnu a zaan ah an zaam hi a si. A zaammi hna hi atu hmanthlak kan langhter mi hna hi an si. Credit: CCN Team

Thawngpang dang. Ralhrang in a zaam mi minung pahnih PDF nih an tlaih hna. Ralhrang kawlralkap Tatma 88 kuttang i, Kahlahyah 83 ah a ummi ralhrang minung pahnih a zaammi hna cu an nung in tlaih an si tiah Eagles Army-HPDF nih tuni ah thawng thanh nak an tuah. Tlaih mi ralhrang pahnih hna cu Thet Koko Htwe le Shine Wana Aung an si.

Hi ralhrang pahnih hna cu Mandalay le Bhamaw lampi ah an tlaih hna tiah an langhter. Mah a zaammi minung pahnih hna cu tangka lei harsatnak le buainak an ngaih ruangah a zaammi an si tiah HPDF nih an thanh chih. Hi hna pahnih cu Madalay le Bhamaw lampi thianhhlimhnak tuah lio ah atubantuk in tlaih an si.