May zarhkhatnak ah ralhraang minung 60 thah an si tiah CNA nih thanh.Chin Ramkulh chung May thla zarhkhat tiang chung ah SAC ralkap he voi 7 kan i kap i SAC ralkap a tlawm bik minung 60 kan thah hna tiah CNA nih cathanh a chuah. Hakha khuapi in Kalay myo lam lei panh in motor 27, raltuknak tank 2 le ralkap thazaang 150 hna cu CNA, CDF-Thantlang, CDF-Zophei le CNDF hna nih May 3 in May 6 tiang kan kah hna.
Ramthlo, Tlangzar, Tal le Thlanrawn kar kahdohnak ah SAC ralkap a tlawm bik 34 an thi i minung 20 leeng hliam an tuar tiah kan theih. Cun May 9 ah CNDF nih Kalay lei a panh mi cu bomb in an kah hna i SAC ralkap 4 an thi.May 7 zong ahkhan Mindat le Matupi motor lampi ah CDF Mindat nih an kah hna i SAC ralkap minung 30 an thi tiah CNF nih a thanh.
Hakha in Kalay lei a kalmi SAC ralkap hna mipi veengtu ralkap nih an kah hna hnu Tlangzar khua UPC Pastor Quarter telh in inn 17 an khangh. Cun, CNA, CDF lei in minung 8 nih ram le miphun ca ah nunak an pek tiah CNF nih May 12 ah cathanh a chuah. Credit: CCNC
Thawngpang dang, Ralhraang hmaisuang camp in Officer pakhat le a dang rank pakhat hriamnam tampi he CDM an tuah, Pyituh pantaing phu nih tangka ting 30 le Runvennak lei Minister Zung nih laksawng an pek hna lai. Council ralhraang hmaisuang camp in Officer pakhat le a dang rank ngei pakhat cu hriamnam tampi he CDM an tuah i Pyituh Pantaing phu nih sing 30 laksawng an pek hna lai i Runvennak lei Minister Zung zong nih laksawng an pek than hna lai tiah Pyituh Pantaing phu nih thawng an thanh.
Ralhraang hmaisuang Camp in Officer pakhat le a dang rank ngei pakhat nih CDM tuah kan duh tiah Pyituh Pantaing sin ah pehtlaihnak an rak tuah hna.Pyituh Pantaing hnu in NUG Runvennak lei Minister Zung le KPICT phu hna nih bawmhchinnak thawng in tlamtling tein an rak chuak kho.
Hriamnam zong tampi an i chuahpi ca ah Pyituh Pantaing phu nih sing 30 laksawng an pek hna lai i Runvennak Minister Zung lei zong nih laksawng an pek rih hna lai. Ralhraang hmaisuang camp in hriamnam he CDM tuah a duh mi poh nih Pyituh Pantaing sin ah pehtlaihnak tuah khawh kan si ti zong phungning in thanhnak an tuah. Source: Khit Thit Media
Leave a Reply