CNA LEI NIH THAWNGPANG TTHA AN VUN THANH CANG

Magway ramthen Gangaw peng in a rak kai mi SAC ralkap hna le tualchung hriamtlai phu kar ah kahdohnak a chuak. Cu kahdohnak ah cun SAC ralkap 30 an thi, hliamhma tuar an tam tiah CNA sin in theih a si.Nizaan April 23, zaanlei suimilam 4:30 ah Lungcawi le Lamtuk khua kar ah kahdohnak a chuah hi a si i, kaphnihkar kahdohnak cu suimilam 1 tluk a rau tiah a chim.

Kee in a ra mi SAC ralkap hna cu SAC ralkap nih hramhram nawlngeihnak a lak hnu Chin ramkulh ah minung thazaang tampi he an rat voihnihnak a si” tiah CNA in chimphuannak nawlngeitu Salai Htet Ni nih Mizzima ah a chim.Cu kahdohnak ah cun CNA le CDF-Hakha phufonh nih an kahdoh hna, mizapi vengtu ralkap lei hliamtuar le a thimi an umlo tiah theih a si.

Tualchung hriamtlai phu hna le SAC ralkap kar caan tawi kahdohnak cu nitin ngawt in a cang nain, a ruang tampi ruangah thawng thanhnak kan tuahlo tiah a chim.February thlachung ah minung thazaang 200 hrawng he Kalaymyo in Hakha lei rallam an sialnak ah CNA le tualchung hriamtlai phufonh nih voi tampi kahdoh an si i, SAC ralkap 100 tluk cu an thicang tiah Salai Htat Ni nih a chim.

Rallam sialtu SAC ralkap hna cu minung thazaang zatceo he lawng Hakha an phan i, Gangaw lei ah an kir than, Gangaw lam lei ah minung thazaang chapin Hakha lei ah an ra than tiah theih a si.Falam in Hakha lei ah a voikhatnak thilri a phormi SAC ralkap tank motor 2 le SAC ralkap minung thazaang 200 tlukhrawng nih zulhmi motor 27 cu a luancia February 27 in March 7 tiangah CNA le tualchung hriamtlai phufonh he tiin kaphnihkar kahdohnak voi 15 tiang a chuak, meng 41 tluk aa hlat i suimilam 2 renglo kalnak khuallam ah SAC ralkap motor ruun nih zerhkhat leng an rau tiah theih a si.