Vanlei kahdohnak ruang ah khuami 200 leng India lei ah an zaam. Chin ramkulh, Thantlang peng, India-Myanmar ramri ah a um mi CNF Headquarters cu January 10 le 11 ah SAC nih vanlei in bom a thlak caah Thantlang peng khuami 200 leng India lei ah an zaam tiah CHRO nih RFA sin ah a chim.
Thantlang peng, Myanmar-India ramri pawng khua 5 in khuami hna cu Mizoram ah an zaam tiah CHRO Manager Salai Mang Hre Lian nih a chim.SAC nih vanlei in kah a thawk ni bak khan an rak zaam hna. January 14 tiang cazin kan lak khawh ning ahcun 210 hrawng an si. Mizoram chung ah an um hna” tiah a chim.
A rak zaam mi pawl cu Mizoram mipi le ramkip a phan mi Chin miphun zatlang phu nih an bawmh hna tiah a chim.SAC nih mipi pawl hliam a tuar kho mi vanlei kahdohnak hi a ngol a herh tiah a chim.Chin ramkulh ah 2021 February 1 in 2023 January 11 tiang, SAC nih vanlei kahdohnak voi 14 a tuah caah mipi 1 le hriamtlai 8 an thih cang bantuk in mipi 35 an i hliam cang tiah a chim fawn.
SAC nih hramhram in uknak a lak hnu ah Chin miphun 52,000 leng India ram lei ah an zaam cang i cu chung ah minung 8,000 deng New Dehli ah an i ṭhial hna tiah a chim fawn.UN OCHA cazin ahcun hramhram in uknak lak a si hnu in 2022 December thla dongh tiang ah Chin ramkulh chung ralzaam 50,000 deng an phan tiah theih a si. Credit: TCP
Relchap. Ralzaam Hna Caah US Luhkhawhnak Lam Thar .Pu Biden cozah nih ralzaam hna caah US luhkhawhnak lam thar (Pilot Program) pakhat a siam. Cucu US rammi (US citizen) asimi nih sponsor in auh khawhnak lam asi. Hi Pilot Program tang ah US State Department tawlrelnak in Welcome Corps tiah a min an bunh i September 30, 2023 hlan ah ralzaam minung 5000 (thongnga) laak khawh ding in timhtuahnak an nei.
Hi program cu a rauh hlan ah an thawk lai tiah theih asi. Hi Welcome Corps program ahhin US rammi (US citizen) a tlawmbik minung 5 an i bawm lai i ralzaam minung pakhat caah a tlawmbik US $2275 an chuahpiak a hau lai ti si. Cun hi auhnak program cu US nih ralzaam a laak tawn hna ning bantuk (the US Refugee Resettlement Program) ning in US ah luhter asi lai.
A fawinak in chim ahcun tahfung an tlinh hau (eligible na si hau). Na konglam dothlatnak (background check) ah na thianhlim hau tinak asi. Cucu Lahwakah (DHS) interview khi asi tawn.President Biden nih kum 2022 – 2023 fiscal year kum khat ( 30 September 2022 – 30 September 2023 ) caah ralzaam minung 125,000 laak ding tiah min a thut cang nain December 2022 tiang ah ralzaam 6750 lawng an laak khawh rih tiah theih asi.
Hi zawn ah theih dingmi cu ralzaam (refugee) ti asi caah UNHCR nih ralzaam ah a cohlan cangmi siloah ralzaam sinak a hmumi (refugee status) lawng si dawh asi.
Cherhchan (Source): Fox news, Reuters. Crd : Ceumi Lian
Leave a Reply