VAAR LILAWN A HIM NAWN LO.CNA ruangah sikha Kalay lamah Falam pengmi a vai theithei an rak vai ih Falam peng laikhua lam mi a rung mal aw phah rupri, Kalay pengah Falam pengmi an rung tam phahnak san! Hihi mino țhangthar cun nan theiban tuk lo ding.. CNA ralbawi lam in dothlenghnak a thok pek khan Vaar lilawn siat ding ta rori social media lamah mipi hna an rak virh, an rak ngan.
A hrekin nan cing lai ko ding.Pengkulh kipin hriamkai neih thluh a si, CJDC (Chinram hriamkai pawlkom) daan pahbal in Falam peng sung le Falam khawpi ah Meithal an ra hmetpuaknak hin thil ra thleng beet vivo ding a langter.Hriamhrei kan nei ih kan duhduh kan tithei tivekin an ruat aw thlang,
Chinram ah an vok lallen thok rero cu a si, Tedim pengkulh khalah tualsung hrambun hriamkai le CNA an rak kap aw zo, Falam khalah ziang boruak a thleng ding ticu CNA ih umdan parah a țhum aw vivo ko ding.Tu ah Falam peng hrambun ralkap CNDF zianghman sim loin Falam khawpi an ra kaap, mipi lam daitein kan um asilen a reihlan ah a tir ihsin an siat caak zetmi Vaar lilawn hi phuahhlam a phunphun tuah in an run tham beet tum ding.
Vaar lilawn a siat cun Falam khawpi le laikhua lam cu ei in le sivai ah an caar cih ding, zarh khat hlanah vava tum ding a si ko, tui Falam khawpi sung an ra kahmi mipi in nan rak dokalh lo ahcun tuar vivo dingin a lo hngak hngai.Vaar lilawn siat hai sehla Hakha le Thantlang lam in an tuar tuk lo ding. Kalay Hmantaw Hakha, Kalay Kankaw Hakha ziin tin ziin 2 an nei.
Falam hrang ahcun Vaar lilawn a siat cun lamzin dang aum lo tluk a si.Kalay Falam Rih lamzin kha ziangtlukin a rak hlunghlai dah? Tui Kalay Tedim Tio ziin vek a rak si dah, nitin motor an rak sukso ringring. Asinaan CNA ruangah Falam khawpi pursumnak ziangtlukin a rung tlasia phah, Tedim peng le Falam peng ah ziangtlukin mipi sual neilo an rak thi? Tuni tiang mi pangai si nawn loin an rung cang lanta?
(CNA an țih ruangah sikha Kalay lamah Falam pengmi a vai theithei an rak vai ih Falam peng laikhua lam mi a rung mal aw vivo, Kalay pengah Falam pengmi an rung tam phahnak san! Hihi mino țhangthar cun nan theiban tuk lo ding.)Tedim peng cun vei hnihnak an tuahmawh le an kut thlaak tuar lo dingin nasatein an timtuah ih an ralring,
Falam peng mipi in teh kan peng kan mipi mi kut tuar saal nawn lo dingin ziangtlukin kan timlam? Kei thawn a pehpar aw lo tin na ruat men thei naan a rei maw reilo, direct or indirect in Falam pengmi zatein a hngong lai ding.MAH huatnak hmai kawr (phuahhlam le sirhsan) ah hmang tahratin Chin miphun sungah peng ramri palzut awknak (Politics ciahneh tumawknak) hi thu a ruat theitu cun theithiam thlang uh.
Hih catawi hi a hrekin asezawng lam lawngin zoh in huatawknak ding ca an ti men thei, ”THUANTHU A HER SAAL” timi thufim vekin liamcia ih cang dah zomi a cang saal beet lonak hrang liamcia thil umdan le tufang thil cang rero khaikhawm in ralrin thiamnak hrang sawn a si.Credit: Salai DL Sennling
Leave a Reply