CNDF NIH RALHRANG MINUNG 105 AN THAH HNA

Thlahnih chung kahdohnak ah CNDF nih ralhrang minung 105 an thah hna. CNDF lei in minung paruk nih ram le miphun caah an nunnak an pek ve. March le April thlachung Falam peng le Kalay peng ralhrang kawlralkap le CNDF i kahdohnak voi 13 a chuak. Hi chungah ralhrang 105 an nunnak a liam.

Hi i kahdohnak ah CNDF lei in minung pali hliam an tuar i, an tlaih hnu ah an thah mi hna hi minung panga an si. Cun kahdohnak ah a nunnak a liammi hi minung pakhat an si. Ralhrang he thlahnih chung i kahdohnak ah CNDF lei in a nunnak a liammi hi an dih lak in minung paruk an si tiah an langhter.

March nihnih Taal le Tlangzar khua kahdohnak ah ralhrang minung 30 an thi i, hliamtuar zat theih si lo. CNDF lei in minung pakhat a thi i, pakhat hliam atuar. Hi Ni i kahdohnak hi CNDF le ttangrual hna an si. Cun March Nithum Zatthal le Dotthek kahdohnak ah ralhrang 20 an thi.Hliamtuar zat theih si lo. Hi kahdohnak ah hin CNDF le ttangrual hna an si.

March Ninga Rihkhuadar i kahdohnak ah ralhrang pakua an thi. Cun March nisarih Rihkhawdawr kahdohnak pahnih an thi. March 15 Kalay thonginn ah minung pahnih CNDF chungtel phungning loin an thah hna. March 16 Kalay le Hakhalay kahdohnak ah ralhrang pathum an thi, Hliamtuar zat theih a si lo. Hi kahdohnak ah CNDF pakhat hliam atuar.

March 17 Rihkhawdawr kahdohnak ah CNDF pakhat a nunnak liam. March 20 Kalaymyo kahdohnak ah ralhrang 7 an thi i, hliamtuar zat theih si lo. March 29 Rihkhuadawr i kahdohnak CNDF pakhat hliam a tuar. April 10 Kalay Yankyiaung kahdohnak ah ralhrang 10 an thi i CNDF pakhat hliam a tuar. Hi kahdohnak ah hin CNDF le CDF KKG an si.

Apirl 11 Kalay Natchaung kahdohnak ah ralhrang 15 an thi i, CNDF lei pakhat hliam a tuar. Hi kahdohnak ah hin CNDF le ttangrual an si. April 14 Kalay Taungta kahdohnak ah ralhrang pathum hliam an tuar. April 18 kahdohnak ah CNDF pahnih an nunnak liam. Hihi an tlaih hna hnu ah an thah mi hna a si. April 25 Kalay Natmyaing kahdohnak ah ralhrang 9 an thi i, hliamtuar zat theih asi lo.

Acunglei langhtermi hi CNDF siseh CNDF le ttangrual hna le ralhrang kawlrlakap hna i kahdohnak thlahnih chung ah an dirhmun a si. Thlahnih chung kahdohnak ah ralhrang 105 an thi i, CNDF lei in minung paruk an nunnak a liam. Cun thlahnih chungah CNDF lei in minung pali hliam an tuar tiah an langhter.