Chin National Organization (CNO) Nih Thawng Fianternak Tuah, Chin ramkulh, Falam khua umhmun khuarmi Kah La Yah (268) in June 15 zan ah Cinmual sang No.2 sianginn kam ah a thawng thang sawhsawh mi bomb an rak puah caah mizapi cu thinphang thlalau in an um. Cu bomb cu mizapi le CNO/CNDF karah hmuhthiam lonak um seh, tiah SAC ralkap nih an tuah hramhram mi a si.
Cu pinah “nan fanu le nan fapa an ruak nan hmuh duh hna lo ahcun sianginn kai hlah u” timi tlirhnak ca zong an tar. June 17 zan sml 10:00 hrawng ah Tlanglu sang No.3 sianginn ah a umi SAC ralkap karah kahdohnak a chuak i, ralkap 1 a thi, tiah theih a si. SAC ralkap pawl nih meithal an kah thluamah caah Falam khua um pakhat cu a kut ah an khen caah hliamhma a pu. Inn chung thilri cheukhat zong an rawk.
Baila khua inn pakhat zong hriamngan nih an khen, tiah theih a si. Hi vialte thil a cang mi hna hi, SAC ralkap nih mizapi le CNO/CNDF karah hmuhthiam lonak um seh ti an duh caah a si. CNO/CNDF nih kan tuahmi hrimhrim a si lo. Cun, vawleicung upadi kan zulh caah siangngakchia le sianginn cu hrawhnak le hnorsuannak kan tuah lai lo, tiah cathanh an chuah.
Relchih: Ramdang Kal Kong Zapi Sin Thawngthanhnak; Ramchung ramleng in mizapi nih nunnak pek in ram le miphun caah dothlennak kan tuah lio ah kan ram chuahtak in ramdang ah kal le zalong tuk in duh paoh tuah cu CDF-Hakha Council nih tha kan pe lo i cu bantukin tuahnak cungah duhlonak kan langhter. Min Aung Hlaing le a ralkap hna nih 2021 February 1 thokin kan miphun le ram cu sal ah ser an kan timh.
Kawl ralkap cu ralhrang nakin an chiakha deuh. Sualnak ngei lo tlaih/hrem/thah a hmangmi, ngakchia le tar nu tar pa hmanh hual lo, an thahmi hna mit an khoih, an kutke an tan, an chia/tha tiang an cik, man lakin an den, mizapi leiah meithal a kap i bomb duh tawk in a thlami, vanlawng hmang in mizapi hual lo kahdohnak tuah hmang, mizapi ngeihchiah a fir i innlo tiang duah a hmangmi, Biakinn le sianginn zongah umhmun a khuar menmi, hramhram in mi ti le tlaihhrem a hmangmi, sualnak ngei lo dan a tat i misual thlah in duh paoh tuahnak nawl pek hmang, miphun dang cimih poi ti lo, Kawl miphun lalnak khua lawng a khang zungzalmi, bawi le mirum tawkuat hnawh i sifak le santlai lo ek a barhmi, ralhrang nak chia deuh an si. Kawl ralhrang ralkap an chiatnak hi chim ah a dong kho lo.
Cu bantuk hna sal ah tan cu kan duh maw? Duh naisai hlah. Nihin ah nang le kei nih kan duh lo ahcun kanmah tel in kan tefa hna tiang Kawl ralhrang ralkap sal ah kan tang lan lai. Nihin hi a caan a si. Kan ram hi kanmah nih kan hngah lo ahcun ralhrang nih an hngah lai. Kan miphun luatnak caah nang le kei nih kan ṭuan lo ahcun aho nih dah a ṭuan lai? Kan ram chuahtak hna hlah usih. Kan miphun luatnak caah kan ti khawhnak cio in ṭuan hna usih. Kan ram nih nangmah theng an herh. CDF-Hakha Council, Pehtlaihnak – +959453724463, Email – cdfcounciloffice2022@gmail.com. Crd; The Chin Post.
Leave a Reply