
Tamu in Kalaymyo Lei Ah A Kalmi SAC Ralkap Cu Tualchung Hriamtlai Phu Nih Bomb Puahhnawh Hna I, Ralkap 50 An Thi!: Sagaing ramṭhen, Tamu in Kalaymyo lei ah bomb thianhhlimh ding in a kalmi SAC ralkap motor 10 cu Tualchung hriamtlai phufonh nih bomb an puahhnawh hna caah SAC ralkap 50 hrawng an thi i, 10 hrawng cu fak ngai in hliamhma an tuar, tiah CDF – Tonzaang nih cathanh an chuah.
SAC ralkap motor run cu Tamu le Kaalymyo kar Mengtung 55 pawng ah KPDF, CDF-Tonzang le PDF-Yazagyo phu nih pa-de-ta bomb lung 30 an puahhnawh hna, tiah theih a si. Kalaymyo lei ah mithi phor motor le mizaw phor motor hna cu chun hnu suimilam 1:30 hrawng ah an phan, tiah Kalaymyo khuasa mi hna nih an chim. Credit: The Chin Post.
Thawngpang dang. Ralhrang kawlralkap nih Kalaypeng Tayakone khua inn hnih an khangh. Tuni August nili ah ralhrang kawlralkap hna le mipi ralkap hna karlak ah kahdohnak a chuak. Ralhrang kawlralkap hna hna cu khuachung ah an lut i, hriamnam ngan he hriamhme he inn an kah i inn hnih a kaang tiah theih a si.
Tuzan zei lei suimilam pathum hrawngah ralhrang kawlralkap hna cu Kalaymyo khuachung in tlanglei ah an kal tiah theih a si. A kalmi ralhrang kawlralkap hna hi motor ngan pakhat le motor hme pakhat in an kal hna tiah mit hmutu hna nih an chim. Culawng siloin cunglei ah Vanlong zong a zuang tiah an langhter chih.
Nizan i kahdohnak. Kalay peng, Tayakone khua pawng kahdohnak ah PDF-Kalay hriamtlai 1 a nunnak a liam. Thlanglei Kalay, Tayakone khua pawng August 3 ah SAC ralkap le mipi hriamtlai phufonh hna karlak kahdohnak ah PDF-Kalay battalion 6 kuttang hriamtlai a simi Wai Min Thaw (Kum 19) cu hriamngan nih a khen caah a nunnak a liam tiah theih a si.
August 3 kahdohnak ah hriamtlai 3 hma an tuar i SAC ralkap a thimi an tam tiah PDF-Kalay battalion 6 nih a thanh.August 4 zongah thlanglei Kalay, Technology University lei, Tayakone pawngkam ah SAC ralkap le PDF-Kalay, CNDF, CDF-KKG le RKDF phufonh hna karlak ah kahdohnak a fak tiah theih a si.
Leave a Reply