Falam ah CNO/CNDF hnatlaknak loin kahdohnak tuah kan duh lo tiah CNO nih ca an chuah. Nizaan January 18 ah a cangmi Falam khuachung CNA le SAC ralhrang kahdohnak kong he pehtlai in Chin National Organization (CNO) nih cathanh an chuah.
Nizaan kahdohnak kong ah CNO/CNDF pehtlaihnak kan ngei lo; (Falam) hmunram ah a ummi hriamtlai bu theihternak tuah loin kahdohnak an tuah caah CJDC hnatlaknak an buar; CNO/CNDF theihternak tuah loin atu bantuk in kahdohnak an tuahmi hi kan lungtling hrimhrim lo; Hi hnu ah mah bantuk a um rih ahcun a herh ning in ttuanhma kan lak lai,” tiah cathanh ah an langhter.
Ngakchia tete telh in sualnak ngei lo minung tampi SAC nih an tlaihmi hna cung ah CNO nih duhlonak a langhter bang in arianrannak in thlahpiak ding zong in halnak an tuah. Nizaan zaanlei sml. 3:30 hrawng ah Falam khua, Farthawk sang ah CNA ralkap pawl nih SAC palik an kah hna caah palik 1 a thi, a dang palik 4 hliam an pu, tiah sang chung mi hna nih an chim. TCJ
Relchap.Ka thih tikah ka ruak cu Saram ei dingah nan rak chiah lai tiah New World Lal Ding Lian nih a chim. Hi konghe pehtlaiin Lal Ding Lian cu Zalen nih biahalnak an tuah. Kum 65 a simi New World Lal Ding Lian nih a timi cu kum 2005 ah khan 1st Class Magistrate theihpinak in ka thih hnu ah ka ruak cu Phongpi tlang ah a ummi saram caah ka pek.
Mah bia hi a tutiang ah ka ruah chih pengmi a si tiah a chim. Saram hna cungah ka cawlcangh ning nih hin miphun bangin upatnak le nihsawhnak aa ka tuah khawh i, nunnak hrimhrim hi a sunglawituk i, hrawhral hi bible ka rel in ka hmuhmi ah a thiang lo tiah ka theih tiah a chim.
New World Laldingliana hi ramsa kilven le dawt lei ah biatak tein rian a ttuanmi a si. Ramsa hna cungah dawt le zaangfahnak langhternak ah tiin Ramsa phun hrimhrim a ei lomi a si. Culawng siloin ramsa in serchuahmi thilri zong aa tuah hruk ballo pin ah keden zong Savun tuahmi aa tuah duh ballo tiah theih a si. Amah nih a chimmi cu Saram hna dawt le an harhnak theih hi ram le miphun upatnak a si tiah a chim.
Leave a Reply