Hakha-Falam karlak Kahdohnak ah SAC Ralrang 15 Hrawng an Thi Cang. Nihin July 8 ah Hakha-Falam karlak Thlanrawn khua pawng ah miphun ralkap nih SAC ralhrang pawl an kah hna i ralhrang 15 hrawng an thi. An ruak pawl motor cung an khinmi hna miphun ralkap nih a lang in an hmuh hna.
Uknak Laak Hnu In Bomb Puahkehnak Ruangah Ngakchia 115 Nunnak A Liam Cang!: SAC ralkap nih uknak an laak hnu February 2021 in April 2022 tiang (thla 15 chung) ah vawlei chung phummi bomb telh in SAC ralkap hmanhmi bomb puahkehnak ruangah ngakchia nunnak liammi cu 115 tiang an phan i, hliamhma tuarmi zong an tam, tiah UNICEF Myanmar nih June 24 ah cathanh a chuah.
UNICEF Myanmar nih cathanh an chuah ning ah Myanmar ramchung ah vawlei chung phummi bomb le SAC ralkap hriamthil puahkehnak ruangah nunnak a liammi le hliamhma tuarmi hna dihlak i cheuthum cheukhat leng cu ngakchia an si, tiah an langhter. Chin nuhrin covo lei rianṭuantu phu chungtel in ṭuanvo ngeitu Salai Mang Hre Lian nih cun SAC ralkap nih nawlngeihnak an laak hnu in Chin ramkulh ah SAC ralkap nih an hmanhmi bomb hna cu tualchung mi caah tinhchihmi a lo, tiah media nih bia an halnak ah a chim.
SAC ralkap nih an hmanhmi bomb i lamhsualnak in tualchung mi tampi nunnak a liam cang i, hliamhma tuarmi zong an tam cang. Cu an hmanhmi bomb a puak lo mi cu ngakchia nih zei thei lo in an tawnghtham caah nunnak liammi zong an um len cang. A luancia August thlachung zong ah Thantlang khuachung ah bomb puahsualnak in ngakchia 4 an nunnak a liam i, 3 nih hliamhma an tuar tiah theih a si.
Chin ramkulh chung Thantlang, Matupi le Mindat peng hna cu vawlei phummi bomb i lamhsualnak ruangah nunnak a liammi tam biknak hmun an si i hliamhma tuar an tam biknak hmun zong a si. A luancia May thlachung ahkhan SAC ralkap lei nih, vawlei phummi bomb hna cu sakhan kan chiahnak hmunhma lawng ah, kanmah himnak ding ca ah ṭha tein kan hmanh tiah SAC ralkap chimphuannak nawlngeitu general Zaw Min Hṭun nih RFA ah a rak chim. Crd. The Chin Post.
Leave a Reply