Falam peng, Falam-Hakha lampi cung um Ṭaal khua pawng ah nihin July 8 chun sml 12:00 hrawng ah SAC ralkap le Chin ralkap kahdohnak a chuak, tiah theih a si. Khuami pakhat nih,”hriamngan thawng cu voi 15 hrawng kan theih. Bomb puah thawng zong kan theih,” tiah a chim.
SAC ralkap motor run 27 cu nizan July 7 in ah Falam in an chuak i, Falam khua lonh Lungpi sang ah an riak. Nihin July 8 zing ah Hakha lei ah an kal i atu batukin kahdohnak a chuah hi a si, tiah theih a si.
Relchih; Sagaing ramṭhen, Kalay peng chungah rallam a sialmi SAC ralkap pawl cu, nizan July 7 zinglei ah PDF nih bomb an puah hna, tiah theih a si. Kalay khuapi hnulei Taungzalat sang lei kap in rallam a sialmi SAC ralkap 50 cu Taungphilar lampi le zung rianṭuantu an umnak inn pawng ah bomb lung 2 in kan puahhnawh hna, tiah PDF Kalay ṭuanvo ngeitu nih a chim.
Zing sml 10:00 hrawng ah bomb in kan puah hna. Mi sawhsawh hna zong an hro, an cer hna lioah bomb kan puah hna hi a si. Taungphilar lamṭhen, zung rianṭuantu an umnak inn pawng ah kan puah hna i, an camp chung ah an lut dih, tiah a chimchap.
Cu kahdohnak ah SAC ralkap 2 an thi i, ralbawi pakhat telh in ralkap 7 hliamhma an pu, tiah PDF Kalay ṭuanvo ngeitu nih a chim. PDF Kalay nih an kah dih hna hnuah SAC ralkap pawl nih tualchung mi pakhat cu ralphaw hman dingah an tlaih, tiah theih a si. Crd. The Chin Post.
Leave a Reply