Australia Auhnak Tuah Tikah. Voi tam-ial ka tial cang (Ka page ah zoh khawh a si) nain naihrawng kan hmuhton mi tete ruangah chimfian hau than in ka ruah caah tlawmpal ka van com than. 2013 hnu in Lai/Chinmi tam deuh Australia kan phaknak cu chim hau lo in Special Humanitarian Program (SHP) visa timi Subclass 202 Visa a si.
Hi VISA in auhnak tuah tikah Offshore Humanitariann VISA 842 Form le Refugee and Special Humanitarian Proposal Form 681 phit (fill up) hnu hmunkhat ah kuat in sok mi VISA a si. Form 842 hi auh mi (Delhi le Malaysia khuasa) lei nih phit mi le Form 681 hi Australia khuasa nih phit ding a si.
Hi Form (s) pahnih hi Australia Cozah nih kum fatin a zoh i remh awk a um mi a remh, rinh awk tha a rinh tawn, cucaah an zoh than (reviewed) hnu ah a kum le ni-caan khenhchih in Acozah Website ah a chiah tawn. Phundang in kan chim ahcun, a hnubik an zoh than mi (reviewed) kha a hman mi, a nung mi a si.
Sinain naihrawng Laimi nih Form kan tuahpiak mi hna hi tuan deuh 2018 hrawng i hman mi (a nung ti lo mi) kha nan hman tawn. Atulio ah hman ding ti mi cu October 2021 ah zohfel mi 842 Form le September 2020 ah zohfel mi 681 Form an si. Cucaah fialtu minung nih an hngalh lo hmanh ah, fial mi (Form phitpiaktu) tal nih hngalh ah a tha.
Cuhlan tawn bantukin kum fatin Ralzam (refugees) kawhauh ding milu zat hi 2022-2023 chung ca ah 13,750 a si. Hihi vawlei cung ram kip chungin a lak tawn mi hna dihlak ca a si. A tlawm ngaingai. Culak ah auhnak Form kan kuat mi hna tlamtlin lo ruang ah hnon mi tampi an um theo. Cucaah Form phit tikah felfai le khunnguh a herh.
Naihrawng Malaysia lei in auhnak tuah mi ca ka sin an phakpi mi an ka zohfelter than tik ah remhchom lawngte an hau (a caan ah cun a thar bak in tuahpiak than an hau). A hlei in Part D – Family Background, Part E – Links to Australia le Part L – Assistance with this Form ti mi chung khi an si. Part L hi Part I – Language and Education he pehtlaihnak an ngeihter caah, Part L zawn i, hi form phitnak ah bawmtu na ngei mi hna khi, English Language Codes an chiah mi 1, 2, 3, 4 he zohchih a herh.
Micheu nih Codes 4 nan thimpiak hna nain, hi form phit ah ahohmanh bawmtu ka ngei lo, keimahte in ka tuah kan ti, hinih lih kan chim a langhter. Hiti ka chim tikah a hngal hlei lo a thiam hlei ka van lo sual hnga, phundang in lakpiak loin, ruahchannak tampi le chawva dih in kan tuah mi a si tikah, kan tuah mi tlamtling lo ruangah chunmang purh lai ka phan caah a si deuh.
Kan ram ralhrang uknak chiatkhat ruangah Delhi le Malaysia lei ah kal in hi Humanitarian Program ruahchih bu he UN a sok mi tampi nan um i Temporary Card aa tlaih cang mi le CRC card aa tlaih cang mi tampi nih nan sok cuahmah lio a si caah siaherhnak he ka van tar mi tu a si ti hngalhpiak ka duh ko.
CRC le UN Temporary Card tlaih mi sok khawh a si maw, tiah a ka hal mi zong nan thahnem ngai, a hngal cu ka si lo, nain mithmuh kut-tongh in a tuah mi zeimawzat a hlawhtling mi an um ti cu el khawh lo a si fawn. Credit: Carson Twintwin.
Leave a Reply