GANGAW PENGAH AN I KAP CUAHMAH, TUTIANG AH PDF LEI AN HIM

Gangaw pengah ralhrang kawlralkap le Mipi ralkap an i kap cuahmah. Tuni May ni 22 chun suimilam 12 hrawnghrang ah Magway ramthen Gangaw peng San khuapi pawngah ralhrang kawlralkap le ralhrang hnu zul Pyu Saw Htee hna cu PDF Gangaw Batallion le a hawi le fonh nih an kah hna.

Ralhrang kawlralkap hna cu mipi ralkap hna nih hriamnam ngan in an kah hna. I kahdohnak mipi ralkap lei in a nunnak a liammi le hliam a tuarmi an um lo. Pehzulh kahdohnak a chuah caah ralhrang lei in a thimi zat fiang tein theih a si rih lo.

Thawngpang dang. Kalaymyo, Dum khua cu ralhrang kawlralkap hna nih hriamnam ngan in an kah pin ah ralzam umnak camp an khangh. Tuni May ni 22 zanlei ah hriamnam ngan in ralhrang hna nih Garden khua cu voi 50 renglo an kah. Ralzam umnak sakhan 80 renglo zong an khangh tiah theih a si

Hi konghe pehtlaiin Dum khua mi pakhat nih a chimmi cu Kyigone Kyauk Khok in ralhrang kawlralkap hna cu Inkyaw khua ah zanhnih an riak i zing ah Dum khua lei an rak panh. Ralhrang kawlralkap hna nih ralzam hna umnak an phak ah khuami hna cu ramtang ah an zam hna.

An thilri vialte hna cu an chiahta hna. Ralhrang kawlralkap hna nih Kanpale Asihkhua in hriamnam ngan an rak kah hna. An rak kahmi hriamnam hi ruahsur in a sur i, mipi zong zong a himnak hmun ah an kal a hau ko tiah a chim. Ralhrang hriamnam ruangah minung pathum zong hliam an tuar tiah theih a si.