GOOD NEWS. KHUA LUH LAI TE AH RALHRANG PAHNIH AN THAH HNA

Lawnglung Peng kahdohnak ah ralhrang kawlralkap minung pahnih an thi. Tuzing May ni 27 ah ralhrang kawlralkap uico rual hna cu Tanintary ramthen Lawnglung peng ah an kal hna. Khuachung an luhlai khualuhnak Signboard pawng an phak ah mipi ralkap hna nih an kah hna i minung pahnih an thi.

Hi konghe pehtlaiin mipi ralkap lei nih thanhnak an tuahmi cu ralhrang kawlralkap hna hi khualuh lai an phak zingka suimilam paruk hrawngah kan kah hna tiah an chim. Ralhrang kawlralkap hna hi motor in an ra. Ralhrang hna hi minung pahra hrawng an si lai.

Minute pahra chung kahdohnak caan hi a si. Hi kahdohnak ah ralhrang kawlralkap lei in a tlawmbik minung pahnih an thi. Mipi ralkap lei in a thimi le hliam hma atuar mi pakhat hmanh um lo tein hnu an soh tthan tiah thawngthanhnak nih an langhter.

A Dang Thawngpang. Vawlei Cimhnak in kum 12 hngakchia Lal Ro Mawi a nunnak liam. Thilsining cu hitihin a si. Lal Ro Mawi le a hawi le minung panga Lal Nun Kim le Lal Ro Kim, Lal Hlim Pui, Van Lal Ruat le Johny hna cu an khua Thinghlun khua pawng ah a ummi Tiva ah Nga tlai dingin an kal hna. Ruah a surtuk caah vawlei an khuar i, an um hna.Van Lal Ruat a nu nih a hmuh hna i va tlung uh tiah a ti hna, Cu ahcun Van Lal Ruat le a hawi le pathum hna cu tlun an i thawh colh.

Lal Ro Mawi le Lal Nun Kim tu cu duhsah in an um rih. Cu tlawmpal ah vawlei a cim colh. Vawlei a cimh ah hin an hawi le tlun aa thawhmi nih an hmuh manh, Rianrang in an zuan hnawh hna.A hmun an phak ah hin Lal Nun Kim cu vawlei nih a phum dih lo a ke a lang. Lal Ro Mawi tu cu vawlei nih a chilh dih. An hawi le nih vawlei cu an huah len nain vawlei a cimh lengmang caah an chuah kho hna lo. Rianrang in inn ah an tlun i an nu le pa an chim hna. An va phak tikah cun Lal Nun Kim cu fawite in an chuah manh.

Asinain Lal Ro Mawi tucu vawlei nih a chilh dih caah an hmu kho lo. Vawlei huahnak ah hin hriamnam hmanrua hman awk a that lo caah kut in an huah. Saunawn in an huah hnu ah Lal Ro Mawi cu an chuah khawh. A nunnak chanh dingin an i zuamtuk nain chanh manh loin a nunnak a liam tiah an langhter.