Myanmar Defense Force(MDF) nih vanlei ralvennak, rifle 6.6 kuan hmang mi, hmunhlat kahnak ah hmanmi rifle phunkhat kan ser mi cu a hlawhtling cang, tiah cathanh an chuah. Vanlawng kahnak taktak bantuk in a thawng mi cu a si lo nain, ṭhathnemnak tampi a ngei, tiah an chim.
Zeitluk hlat tiang dah a kah khawh cu fiang tein chim awk a ṭha rih lo.Zeiruang ah ti ah cun zei tluk tiang a kah khawh kan chim ahcun cunak hlat sang in vanlawng an zuang sual lai. 1km nak sang tinh mi hmun cu ṭha tein a kah khawh.
Hi hriamthil hi voi tampi zohchunhnak tuah in a tlamtlin hnu ah kan langhter mi a si, tiah Myanmar Defense Force(MDF) in ṭuanvo ngeitu pakhat nih a chim.Kan ser mi hriam cu vanlawng kahnak taktak bantuk in a thawng lo na in, hriamthil tampi he hmunkip in ṭan khawh ahcun a ṭhawng mi hriam a si kho, tiah a chim chap.
Thawngpang dang. Kahdohnak kong CNF nih thanhnak an tuah cang. Ralhrang kawlralkap le CNA, CDF-Thantlang, CDF Zophei le CNDF fonh hna cu May nithum in May niruk tiang kahdohnak a tlawmbik voithum a chuak. Hi kahdohnak ah ralhrang kawlralkap minung 34 an thi i, minung 20 nak tlawmlo hliam an tuar.
Kahdohnak hmun hna cu Hakha le Falam karlak Ramthlo le Tlangzar cun Taal khua ah a si. Hakha khuapi kalay lei in ralhrang kawlralkap hna cu motor 27 le tank pahnih, ralhrang hi minung 150 hrawng an si lai. Cu hna cu mipi ralkap fonh hna nih kah an si. Ralhrang hna nih Ramthlo ah inn 10 an khangh.Cun Tlangzar khua UPC biakinn he inn 16 an khangh rih. May Ni kua ah Falam in Kalay lei ah ralhrang hna cu an kal i, CNDF nih an bomb in an puah hnawh tthan i ralhrang minung pali an thi.
Matupi in Mindate lei ah a kalmi ralhrang hna cu May ni 7 in niriat ah CDF Mindat nih an kah hna i ralhrang 30 nak tlawmlo an thih pin ah tamtuk hliam an tuar.May nithum in Niruk tiang Hakha le Falam karlak tukdohnak ah mipi ralkap lei CNA in minung pali le CDF Thantlang in minung pali nih ram le miphun caah an nunnak an pek tiah an langhter.
Leave a Reply