Karenni ramkulh chung, May thla zarh khatnak chung council ralhraang le Karenni phu komh kar kahdohnak ah ralhraang 44 an thi. Karenni ramkulh chung, May thla zarh khatnak chung council ralhraang le Karenni phukomh kar kahdohnak ah ralhraang 44 an thi, ralhraang motor 8 an khangh, KNDF lei in pakhat a thi tiah KNDF nih thawng a thanh.
Council ralhraang nih Hparuso peng le Bawlakhe peng ah riahcaw le hriamnam an chanh lengmang hna ca ah Hparuso-Bawlakhe lam cung kap hnih kar kahdohnak a fak i, cu peng pahnih chung ah kahdohnak voi 13 a chuak tiah an chim. Hparuso-bawlakhe lam cung um Nanphe khua le Lawkywekhu khua pawng ah riahcaw le ralhriam phur in hmai a nor mi ralhraang motor 30 hna cu
KNDF le tangti phu komh hna nih atu le atu an kah hna ca ah ralhraang 44 an thi i motor 8 an khangh. Meithal 15 tel in ralhriam cheukhat he ralhraang pahnih an nung in an tlaih hna tiah KNDF sin in theih a si.Cu lawng si lo in Hparuso peng le pawngkam khua hna ah council ralhraang nih umhmun an khuar ca ah council ralhraang le KNDF tangti phu komh, PDF tangti phu komh kar kahdohnak nifatin a chuak tiah KNDF nih an thanh. The Hakha Post
Thawngpang dang. Thailand thlanglei Narathiwat ramkulh Tak Bai ah Myanmar mi 89 cu May 7 ah tlaih an tong tiah theih a si. Tlaih a tong mi hna hi Malaysia ah phung ning loin an luh khawh nakhnga a hngak mi an si. Tak Bai ah inn pahnih cu palik nih luh hnawnh in an chek i, a chung ah Phungning loin ramdang a lut mi, Myanmar mi hna cu an tlaih hna, tiah Narathiwat ramkulh Deputy Police Chief Thawatchai Duksukkaew nih a chim. Myanmar mi a phortu mawtaw(pick-up) 3 zong palek nih an tlaih chih.
Palek nih an luh hnawh lio ah a zaam manh mi mawṭaw khaltu hna cu kan kawl lio hna a si, tiah palek nih media he tonbiaruahnak ah an chim. Ram chung ah phung ning lo chawlehnak(smuggling) cu kham khawh a si nakhnga ramri security kan ṭhawnter deuh lai, tiah Narathiwat ramkulh in ṭuanvo ngeitu ralkap bawi Chalermporn Khamkhiao nih a chim.
Leave a Reply