Ralhrang minung 102 thah an si. Nizan June ni 17 ralhrang kawlralkap le mipi ralkap i kahdohnak ah ralhrang minung 102 an thi i, mipi ralkap lei in minung 7 nih ram le miphun caah an nunnak an pek. Mipi ralkap lei in Minung panga ralhrang nih an tlaih hna.
Kahdohnak hmun le hma a chuahnak, Sagaing ramthen Katha kahdohnak ah ralhrang minung 40 an thi i, mipi ralkap lei in minung pakhat nih ram caah a nunnak a pek. Tedim kahdohnak ah ralhrnag minung 7 an thi. Sagaing ramthen Minmu kahdohnak ah ralhrang minung pali an thi i, Yinmapin kahdohnak ah ralhrang 15 an thi.
Mipi ralkap lei in minung pathum nih ram caah an nunnak an pek ve. Yesako kahdohnak ah ralhrang kawlralkap minung pakhat a thi, Shwebo kahdohnak ah ralhrang 35 an thi i, mipi ralkap pahnih nih ram le miphun caah an nunnak an pek ve. Mandalay ramthen Kauhpantaung kahdohnak ah mipi ralkap pakhat a thi i minung 5 an tlaih hna.
Thawngpang dang. ralzaam 99% leng ID Card chuahpiak an si cang. India, Mizoram ah aa dormi Myanmar ralzaam chung in 99% leng ralzaam ID Card chuahpiak an si cang tiah theih a si.Mizoram Ministry of Home Affairs hruainak in dirh a simi High-Level Committee on Myanmar Refugee’s phu i June 4 tiang a ngeihmi cazin ning ahcun Mizoram ah ralzaam 29,964 um a simi chung in 29,751 sin ah ID Card chuahpiak an si cang caah 99.28% nih ID card an ngei cang tiah The Aizawl Post thawngzamh ah langhter a si.
Myanmar ram ah February 1 thok in SAC nih hramhram in uknak a lak hnu ah ram pumpi in hramhram uknak doh a si i ralkap nih mipi pawl tlaih le thahnak hna a tuah lengmang caah Sagaing ramṭhen le Chin ramkulh mipi hna Mizoram ah zaam a si.Mizoram ah a zaammi ralzaam hna ningcang tein cazin lak ding in Mizoram cozah nih a dotdot in Committee a ser i a luancia February thla thok in ralzaam ID chuahpiak an si.
High-Level Committee on Myanmar refugee’s phu cazin chungah Mizoram peng le ramṭhen 6 ah Relief Camp 149 a umm i cu camp hna ah ralzaam 11,833 um a si i camp si loin a dang hmunhma ah a ummi 18,131 an si tiah theih a si.
Leave a Reply