Sagaing Le Magwe Ah SAC Ralkap Doh Ding In PDF Phu 40 Leng Nih Ṭangrual Phu An Dirh!Sagaing le Magwe ramṭhen in PDF phu 40 leng nih nizaan July 23 ahkhan ṭangrual phu an dirh i, uknak latu SAC ralkap cu an hram cah tiang in kan doh lai, tiah ṭangrual phu in ṭuanvo ngei nih an chim.Ṭangrual phu hna nih cun hmuitinh mi pali ngei in an dirhnak kong an chim.
I, teinak hmu kho ding in hmunkhat rianṭuanṭi, pehtlaihnak ṭha deuh ngei in thazaang chuah, hriamtlai phu hna le mizapi kar ah zumhnak he caan sau pehtlaihnak ngeih i hriamtlai phu hna karlak ah i zumhnak ser tibantuk pinah, pakhat le pakhat i upatnak le i bawmhchanh ti hna cu an i hmuitinh mi a si, tiah ṭangrual phu lutlai hna nih an chim. Credit:The Chin Post.
Thawngpang dang. SAC Ralkap Nih Demoso Peng Ah An Thah Mi Unau Hna Ruhro Cu Hlai Ṭhan A Si!: SAC ralkap nih Demoso peng, Sanpiah in meng 6 (စံပြ ၆မိုင်) ah an thah mi unau hna ruhro cu Karenni Free Burma Ranger le tualchung KNDF battallion 9 i bawm in nihin ah an hlai ṭhan, tiah theih a si. “Thla 5 a rauh hnu ah zohchia ngai in an thah mi unau hna chungkhar he kan i ton ṭhan tikah tikhor chung ah aa taang rih mi an ruhro cu laak ṭhan ding in bawmh an kan hal hna i, KNDF battallion bawmhnak in an luruh 2 kan laak hna,” tiah Karenni Free Burma Ranger in ṭuanvo ngeitu nih an chim.
Unau hna hi an rak tlau hmasa i an chungkhar, khuami le tualchung mipi vengtu ralkap hna nih an kawl hna i, zarh 3 hnu ah an ruak in hmuh ṭhan an si. Asinain, cu lio ah cun kahdohnak a zual lio a si caah tikhor chung i an hlonh mi an ruak cu char khawh dih a rak si lo i, an ruhro zeimawzat te lawng laak khawh a rak si. Atu ah cun an chungkhar hna nih bawmh an hal ruangah a dang a taang mi an ruhro cu an laak ṭhan, tiah theih a si.
A luancia February thla ah Demoso peng Sanpiah in 6 meng ah khua mi 4 cu facang le tisik anhnah laaknak in an kir lei ah SAC ralkap nih an rak tlaih hna i, an rak thah hna. Thah a tong mi 4 lak ah 2 cu ekkhor ah an hlonh hna i 2 cu feet 40 hrawng a thuk mi tikhor chung ah an hlonh hna.
Leave a Reply