Pago ramṭhen, Nguang Lay Pin pengkomh, KNU Brigade 3 hmunram Kyauk Kyi peng ah June 25 le 24 ah KNLA le SAC kar kahdohnak voi 3 a chuak i, SAC ralkap 14 an thi, tiah KNU nih nihin June 27 ah cathanh an chuah. June 25 zing sml 7:00 hrawng ah Nga Biat Inn khua le Inn Net khua karah ral tuk bawmh ding a rami SAC ralkap Kha Ma Ya 439 Battalion in ralbawi 1, ralkap zohkhenhtu(sergeant) 1 le lam hmuhsaktu Than Lwin hna cu Sniper kahnak in an thi, tiah theih a si.
Atu hrawng cu kahdohnak a chuak peng. KyuakSaYit(ကျောက်စရစ်) sakhan kah an tong i Battalion 439 nih an rak bawmh hna. June 25 zinglei ah InnNet lei in rallam an sial. Rallam a sial mi hna cu Sniper in an kah hna caah Battaliin 439 in ralbawi 1, ralkap zohkhenhtu(sergeant) 1 le lam hmuhsaktu pa cu an thi,” tiah tualchung mi pakhat nih a chim.
KNU nih cathanh an chuah ning ah Kyaukkyi peng nihnih chung kahdohnak ah SAC ralkap le lam hmuhsaktu telh in 14 an thi. SAC ralkap pawl nih InnNet khua le Yan Myo Aung khua cu hriamngan in an kah, tiah an langhter. Kyauk Kyi peng ah kahdohnak a zual i, SAC ralkap nih hriamngan an kah tuk caah KyaukKyi peng khuate 15, milu in a thong leng cu a himnak ah an zam, tiah tualchung mi hna sin in theih a si. Credit: The Chin Post.
Thawngpang dang. Ralhrang kawlralkap nih an sakhan chung le thonginn chungah minung an thahmi minung 95 an si cang tiah an langhter. Hi konghe pehtlaiin ramleng kip in phu 14 hna nih ralhrang kawlralkap dantatnak tuah dingin nawlnak ca an chuah. Ralhrang kawlralkap hna nih hriamnam rinhchan in mipi cungah cawlcanghnak an tuah. Cu an tuahmi cu ASEAN telh in UN chungtel ramkip hna nih dantatnak tuah dingin ramchung phu 14 hna i bawm in nizan June ni 26 ah nawlnak ca an chuah tiah theih a si.
Ralhrang kawlralkap hna nih mipi covo tuksum in an tuah ruangah vawlei cung ramkip nih dantatnak pek dingin nawlnak an tuah hi a si.Hi kongkau hi RFA thawngzamhnak Myanmar Nu lei buu chungtel pakhat nih a chimmi a si. Hi nawlnak ca an chuahmi chungah hriamnam lei phihkharnak biatak tein a um khawhnak ding le ramkheel ruangah thongthlak mi tukvelhnak ngol ding, Cun phung an buarmi pawl vialte ICC kut chungah pek ding timi pawl aa tel.Ralhrang kawlralkap hna nih hramhram in nawlngaihnak an lak hnu kumkhat renglo chungah ralhrang kawlralkap sakhan le thonginn chungah an khumhmi hna chungin minung 95 an thi cang i, khuami minung 2021 zong ralhrang nih an thah cang hna tiah cathanh ah an langhter chih.
Leave a Reply