Good News. Tuzing Tio i kahnak ah ralhrang minung panga an thi, Minung pali mipi ah an i ap. Tuni Falam peng Tio ah mipi ralkap le ralhrang hna cu zingka suimilam pahnih in pasarih tiang kahdohnak an tuah. I kahdohnak ah ralhrang lei minung panga an thi i, minung pali mipi ralkap sin ah an i fonh tiah CDF Siyin nih an thanh.
Rih a ummi ralhrang hna nih hriamnam ngan in an bawmh hna i voitampi an kah. Cu an kahmi tthenkhat cu khuachung ah a tla i, inn a hrawhmi zong an um. Ralhrang hriamnam ngan a puak mermi ruangah ralzaam pakhat a nunnak a liam i, midang pahnih hliam an tuar tiah khuami hna nih an chim.
Tio tlangpar ah a ummi ralhrang hna cu CDF CDM-Siyin le, PDF Zoland cun CNDF le MEDF hna i fonh in an kah tiah theih a si. Kahdohnak ah ralhrang lei hliamtuar tampi an um i, minung pali cu hriamnam loin an i ap tiah an langhter. Cun tuni i kahdohnak ah CDM Siyin chungin minung pakhat hliam a tuar tiah an thanh chih.
Relchap. Chin ramkulh, Tedim peng, Laitui khuami pakhat cu ti lam ser ding in a kalnak lam ah August 8 ahkhan bomb hmanhmi i lamhsualnak in hliamhma tuar, tiah tualchung mi pakhat nih a chim. Laitui khuami Salai Kam Za Hmung kum 40 cu fur caan ah a rawk lengmang mi an ti ratnak lam ser ding in a kal lio ah bomb i lamhsualnak in a kee ah hliam a tuar, tiah khuami pakhat nih a chim.
Cu bomb cu mi zei phu nih an hmanhmi a si zong kan hngal lo, kan umnak lei ah cun kahdohnak zong um lo, tiah a chimchap. Laitui khuami pakhat nih bomb aa lamhsualnak kong he pehtlai in SAC ralkap lei media, Fifty Two News nih cun, Sia kawl ah a kalmi khuami pakhat cu CDF nih an hmanhmi bomb aa lamh caah hliamhma tuar, tiah an thanh.
Laitui khua cu Tedim peng, inn 1000 hrawng umnak khua a si i, Laitui khuami nih bomb an i lamhsual hi a voihnihnak a si cang. A luancia July thla ah khan Sia a kawlmi pa pahnih cu bomb an i lamhsual caah pakhat cu a nunnak a liam i, pakhat cu a kee bul leng ah a mit zong a rak hliamh chih, tiah theih a si.
Leave a Reply