Ralkap bomb nih Hniarlawn khuami Pi Chia Hnem an coka ah a tlak i a nunnak a liam cu ngaih a chia hringhran. Hakha le a pawngkam ummi nulepa hna cu ihkhun cung i hngilh hmanh ah hna a ngam kho ti lo dirhmun kan phan than cang ko rua. Miphun dawtu ramtang kan unau hna nih caan sau ngai khuachung i kahdohnak nan rak hrial i Hakha khuami hnangam deuh ngai in rak um a si.
Nain, tukar nan hun kah than lengmang hna tikah Mizoram le khuate ah kan zam than ne lai maw tiin vansang a aumi an tampi lai.Nunnak tiang a thapmi pasaltha nan si caah nan thil tuahmi cung ah hohmanh nih mawhchiat le soisel ngam ding cu nan si bak lo, nain khuachung i kah cu kan hrial piak hram ko u timi hi nulepa tampi an phuan ngam lomi biacah a si.
Ralkap cu uihrut bantuk an si caah kah an ton caan poah ah mizapi lakah meithal le bomb kah khi thlachiat an ruat bal lo, khuachung nan kah hna caan ah a ingtuar tu taktak cu kanmah miphun lila kan si tawn. Thantlang bantuk in Hakha a ciam dih ve sual lai timi zong phan a um.
Mizapi um lonak Timit le Thantlang ah MAH ralkap an tam tuk ko caah zalawng tein anmah pawl khi fimtawl hmasa ko u law, an dih cang ti tikah Hakha ummi ralkap zong a herh ning in nan rak thuat ve te hna lai, cutik i a phunzaimi an um sual ahcun keimah hrim nih an cal ka kingh te hna lai. Credit: Salai Lungthlitum.
Chin ramkulh, Paletwa ah thilri phorhnak ah hmanmi Paletwa-Kyauktaw(ကျောက်တော်) ti lam cu SAC ralkap nih August 3 khan rikhiah um lo in an phihkham caah tualchung mi harnak an tong, tiah theih a si.Atu hi Paletwa khuachung ah zapi eimi facang, chiti, cite, arti, khachuan, petrol hna cu phaisa tampi pek zong in cawk ding a um ti lo, tiah Paletwa khuachung ummi pakhat nih a chim.
Cheukhat cu ei ding an ngei ti lo, dawr cheukhat cu thil man an kaih i, arti pumkhat ah 500 an hauh, atu ah cun cu arti zong cawk ding a um ti lo, dawr ngeitu hna zong nih ei ding kan ngei ti lai lo, tiah an dawr thil zuar an siang ti hna lo, zei bantuk ei ding hmanh cawk a ngah ti lo,” tiah a chim.
Atu bantuk in khuachung ei ding tirawl a cah cang caah Paletwa-Kyauktaw ti lam hi a rannak in kan honpiak hram hna seh, tiah tualchung mipi nih nawlnak an tuah.Dat-si zong langkhat ah Ks. 10,000 pek hmanh in cawk ding a um ti lo, facang chinchin cu cawk a ngah ti lo, Bag khat ah singkhat hmanh in a zuar siang mi an um lo. Atu bantuk in lam an phih peng ahcun rawlṭam in thih lawng a tang ko,” tiah Paletwa khuami pakhat nih a chim.
Paletwa cu Rakhine ramkulh Kyauktaw le Sittwe in ei ding tirawl le thilri a luh tawnnak khua pakhat a si. Nihin August 10, zinglei in Paletwa khah-mah-yiah 289 battalion in SAC ralkap hna nih pehzulh ngai in hriam an puah caah sianginn zong an khar, tiah tualchung mi nih an chim.
Leave a Reply