HAKHA PALIK ZUNG LE THANTLANG GATE AN KAH, CHUNCUNG AH BOMB 2 A TLA

CDF/CNA nih Hakha District Palik Zung le Thantlang Gate an Kah. Nizaan July 13, zaan ah CDF/CNA nih Hakha in Thantlang lei kalnak lam ah a ummi Hakha District palik zung le Thantlang Gate ah a ummi SAC ralhrang pawl an kah hna, tiah thawng kan theih.

Nizaan zaan sml. 10:00 hrawng ah kahdohnak a chuah hi a si i, minute 20 chung hrawng an i kap.Kan miphun ralkap lei nih bomb in an kan hmansa hna i, cu dih cun meithal in pehzul in an kah hna. SAC ralhrang lei in a thimi le hliam a pumi an tam kho tiah an ruahdamh nain zaan a si caah fiang in theih a si lo.

Falam lei in Hakha ah a rak rami SAC ralhrang le Chinland Joint Defense Committee (CJDC) chungtel kan miphun ralkap pawl zong Chuncung khualuhnak ah atu an i kap cuahmah.Hakha le Falam ah a ummi SAC ralhrang nih miakpi in kah an bawmh hna i Chuncung khuachung ah bomb voi 2 a tla cang, tiah thawng kan theih.

Thawngpang dang. Ralhrang kawlralkap nih helicopter panga in an kah hna. Sagaing ramthen Khin Oo peng le Depezin karlak Nyaung Hla khua le Mayankan khua cun Yece le Namah khua telh in ralhrang kawlralkap hna nih helicopter in an kah hna i khuami hna cu an zam dih tiah theih a si.

Tuni July ni 14 suimilam pakhat le minute sawmli ah ralhrang kawlrlakap hna nih helicopter panga hmangin khua hna cu an kah hna.Khuami hna cu nunhimnak ah an zaam dih hna. Hi konghe pehtlaiin Nyaung Hlah khuami pakhat nih a chimmi cu atu zong an kah cuahmah ko. Ralzam an umnak thingtang tiangin an kah tiah a chim.

Khuami hna cu Dipezin le Khin Oo peng ah an zam dih hna. Hi kahdohnak ruangah chiatnak tampi a chuak kho i, a sinain zeihmanh fiangtein theihmi a um rih lo tiah an chim chih. Tuzing suimilam pali ah ralhrang kawlralkap le mipi ralkap hna cu Ye Oo le Khin Oo lampi ah an i kap hna. Ralhrang hna cu bomb nih a puah hnawh hna i minung 8 nak tlawmlo an thi tiah theih a si.