Hell kal ding a fian bakmi hna cu, Pakhatnak. Jahovah Pathian lawnglawng a zummi Judah mi cheukhat hi an si. ( Johan 8 : 39 – 43 ). Pahnihnak. Cu he aa pehtlai in cun nihin tiang zongah Jesuh Khrih lawnglawng a zummi Oneness pawl hna zong hi an si ve fawn. ( Hika ah Oneness ka van ti tikah hin Oneness kha ka soisel le ka doh hna si loin Jesuh lawnglawng a zummi kha ka van ti duhmi hna cu a si.
Oneness a timi minung hna chungah hin Trinity a rak simi zong tampi ka hngalhmi an um ve ko hna ee. Cucaah cun Oneness pawl zong nan lungfak hlah seh. Pathian biatak hngalhtu hna hi i tim ve cang tuah uh ). Pathumnak. Cun Trinity ka si aa ti ko bu le a dang doctrines a zummi pawl hna zong an va si ko bu ah Jesuh Khrih lawnglawng a zummi hi Laimi chung hrimhrim ah hin tam ngai te nan um cang hna. Nan zumhning kha ca in nan tialmi ah a lang dih ko.
Cu hna pawl cu Laimi kan si miphun dang an va si ah Hell ah a kal dingmi lawngte kha an si hna tihi a cung Jesuh bia zohchih in fian tein kan hngalh khawhmi cu a si. Zeicatiah cun zumhnak kongah Pathian sining hna i palh cang caah aa palhmi zumtu si ti a chimtu zong um ko nain i remh duh lo cu sual a si caah Hell ah an kal ko lai. Nan ka zumh lo a si ahcun Mirumpa bangin Jesuh Khrih tang cung ka pom tikah tii a ka haltu na si lai tihi Pathian min in kan hngalhter hna.
Note : Hi hna pawl hi cu zeitluk hmanh in Bible bia cawnpiak an thiam ko zongah, cun an nun aa dawh tuk ko zongah, cun an fel le a that tuk ko bu zongah khan an covo cu Cepa thiamthiam a simi Hell kha a si ko lai. Jahovah Pathian lawng zumh ti bantuk le a Fapa Jesuh Khrih lawng zumh ti bantuk hna hi rak ngah sehlaw cu Jahovah Pathian nih a Fapa Jesuh Khrih kha vawlei minung vialte hna khamhtu dingah a rum thlah a hau hnga lo. ( 1Johan 4 : 14 ).
Hell in kan luatnak ding caah le vancung menber kan sinak ding caah Pathian biatak hngalh dingmi cu Jahovah Pathian kan Pa nih a duhmi cu a Fapa Jesuh Khrih zumh kha a si. ( Johan 6 : 40 ). Cun Fapa Jesuh Khrih nih a duhmi cu vawlei ah a rak thlahtu Jahovah Pathian kan Pa zumh kha a si. ( Johan 5 : 24 ). Cucaah cun amah Jesuh hrimhrim zong nih khan, Khuaruahhar lungrethei in um hlah u. Pathian kha zum u, keimah zong kha ka zum ve u.
Ka Pa inn chungah khaan tampi a um ko i cuka i nan caah hmun va timh awkah ka rak kal lai. Cu bantukin si hlah seh law hitihin kan chim hna hnga lo,” tiah a rak ti phah khah. ( Johan 14 : 1 – 2 ). Cu bantukin Jahovah Pathian le a Fapa Jesuh Khrih a zumtu minung hna lawng hi zumhnak tling aa ngeihmi an si caah khan zungzal nunnak siseh, vancung member an si taktak cang caah Fimchimtu le biatak phuangtu Thiang Thlarau zong kha a takin pekmi cu a si.
Cu bantukin Jesuh Khrih zong nih, “Cu ni a phak tikah cun keimah cu zeihmanh nan ka hal lai lo. Biatak kan chimh hna: Ka Pa nih ka min in nan halmi paoh cu an pek hna lai,” tiah a ti. ( Johan 16 : 23 ). Hika ah Jesuh nih a min in a Pa, Jahovah kan Pathian sinah hal a kan fialmi hi Thiang Thlarau kha a si. ( Luka 12 : 13 ). Cucaah cun Jahovah Pathian le a Fapa Jesuh Khrih zumhnak thawngin Thiang Thlarau a hmumi paoh cu vancung member zong an si cang caah hin van Pathian umnak khualipi cu an ta zong a si cang.
Cu bantukin ka dawtmi ka nu le ka pa le ka unau a simi vialte hna nangmah zong hi Jahovah Pathian le a Fapa Jesuh Khrih cu na thinlung dihlak in na zum kho ve taktak cang maw? Na cohlan taktak kho ve cang maw? Na nun hi nangmah tein rak i check ve law tiah Bawi khrih min in kan sawm hna rih ko hna ee. A biathiang aa hrawmmi zumtu nan dihlak kan Bawipa Jesuh Khrih Pathian sunparnak Pa nih cun amah hngalhnak dingah fimthiamnak le phuangtu Thlarau cu in pe ko hna seh. ( Efesa 1 : 17 ).Thank You For All; Johnly Fambawl
Leave a Reply