Sagaing ramṭhen, Yinmarbin khua in rallam a sialmi SAC ralkap pawl cu May 15 zinglei ah PDF nih bomb an puahhnawh hna, tiah theih a si.Yinmarbin in Monywa lei ah rallam a sialmi SAC ralkap pawl cu Yinmarbin peng chung ah kan kah hna caah SAC ralkap 5 an thi, tam ngai hliamhma an pu,” tiah Brother Defense Force in chim phuannak nawlngeitu pakhatnih a chim.
Zing sml 11:30 hrawng ah bomb in kan puahhnawh hna, hliamhma a pu i an chiahta mi SAC ralkap pawl nih Ywathaywa khua an khangh. Cuka hmun in meithal an kah thluamah hnuah Nguangpinkyi khua in Monywa lei ah an kal. Kanmah lei in a thimi le aa hliammi kan um lo,” tiah a chimchap.
Cu kahdohnak ah Brother Defense Force(BDF), MRDA, Salinkyi-PDF le Brother-PDF hna an i bawm, tiah theih a si.A luancia May 8 lioah Shwepan khaing khua sianginn ah umhmun khuarmi SAC ralkap 80 hrawng cu, ṭangṭi phu hna he hriamngan in kan rak kah hna, tiah Brother Defense Force nih cathanh an chuah. Credit: The Chin Post.
Thawngpang dang. Chin ramkulh, Paletwa peng Thandaung(သံထောင်) khua ah ummi SAC ralkap pakhat cu nizan May 15 chun sml 12:00 hrawngah Helicopter nih eidin tirawl a chanh hna lioah AA ralkap nih an kah, tiah theih a si.Thandaung khua cu Rakhine ramkulh, MyoOo khua i chaklei tiva kam ah a ummi khua a si.
Thandaung khua pawngkam ah AA ralkap pawl an cawlcang nak hi a sau ngai cang, tiah tualchung mi sin in theih a si.Eidin tirawl a chantu Helicopter cu a ṭum lei ah tiva ral in AA ralkap pawl nih hriamhme in an kah. SAC ralkap zong nih an camp in hriamngan he hriamhme he an rak kah ve hna. Suimilam cheu chung hrawng an i kap, tiah theih a si.
Cu kahdohnak ah Thandaung khuathar inn pakhat cu meithal kuan nih a khen, Khua chung zong ah hriamngan kuan a tla ko nain a puak lo, Thandaung khuathar mizapi cu an zam dih, tiah theih a si.Thlanglei Thandaung khua hi inn 200 hrawng an si i khuathar hi inn 50 hrawng a si, tiah theih a si.
Leave a Reply